BABEL

Dr. B.R. Marpna

Ka Babel ka dei ka kyntien ba la khot hadien ba U Trai U la pynsakma ia ki briew kylleng ka pyrthei bad ruh ha ki jait ktien kiba pher bapher. Kane ka bynta ngi lah ban shem na ka Kitab Jenesis 11:1-9. Shuwa ba kin iatei bad thaw ia ka nongbah da ka jingthmu ba kan kot haduh ki kliar jong ka bneng bad thaw nam ialadei, nyngkong eh ka Baibl ka iathuh ia ngi ba ki don tang kawei ka ktien kaba ki iakren bad ki lah ban ia sngewthuh iwei ia iwei pat. Lehse ngi lah ban ong ba kam don ka jingklumar ha ka ktien kaba ki iakren bad ki lah ban pyniaid beit ia kaei kaba ki thmu ha ka jingim ka jong ki. Hangne ngi lah ruh ban ong kine ki briew ki la sdang ban klet ia U Blei bad ki mut ba kin pynkhraw ialade bad pyniohnam ne burom.

Ka jingkwah nam ne burom ka long kaba U Blei Um shem sngewbha lait tang kaba U hi, U pynkup ka nam bad ka burom ha ka jingim jong ngi. Ia ka burom U Blei Un nym ai hano hano, lait tang ma U hi haba ngi peit na ka Kitab jong u Isaiah ‘Nga long U Trai; kata ka long ka kyrteng jong nga: te ia la ka burom ngan ym ai ha uwei pat, lymne ai ia ka jingiaroh ha ki bleithaw’ (Isaiah 42:8). U Jisu U kren da ka tyngeh haba ngi peit katkum ka Gospel u Ioannis 5:44 ’Kumno phi lah ban ngeit, phi kiba iakhmih burom paralok hi, bad phim iawad ia kata ka burom kaba na U Blei uba tang ma u hi?’ U Jisu Um ju wad ia ka burom briew bad haba U leh ki kambah ruh um ju kwah mano mano ban tip. Ha kajuh ka Gospel katkum u Ioannis na kajuh ka lynnong bad ka dkhot kaba 41 ‘Ngam pdiang ia ka burom na ki briew’. Kine ki briew ha Babel ki lah kwah eh ia ka burom bad ka nam haduh ba U Blei U la lynshop noh ia ki bad U pynklumar ia ki ktien kaba ki iakren bad ka la pulom lut ka jingthmu jong ki.

Shuh shuh ngi iohi ba kine ki briew, ym tang ba ki kwah nam bad burom hynrei ki pyrkhat tang ialade. Ka jingpyrkhat tang ialade ruh ka long ka jinglong kaba U Blei U isih ‘Ki la ia ong ruh, Ia ngin iatei ia ka nongbah kawei ialade” (Jenesis 11:4). U Paul ha ka shithi sha u Timothi u ong ba ha ki sngi kiba khatduh, ki briew kin long kiba ieid tang ialade bad ka Ktien U Blei ka ong kumne ‘Hynrei to tip ia kane ba ha ki sngi kiba khatduh kin wan ki por bashitom. Namar ki briew kin long kiba ieit tang ialade’ (2 Timothi 3:1.2).

Kawei pat ka bynta haba ngi peit na ka Babel, ngi iohi ruh ba ki thmu ia kane bad khlem don mano mano ba khang ia ki ‘…te mynta kaei kaei ruh em kan ym khang ia ki ban leh ia kaba ki lah iathmu kein’ (Jenesis 11:6). U Blei Um juh khang haba ngi thmu jubor ia kano kano ka bym dei bad Um ju leh jubor. U ai ha ka mon laitluid ba ki briew kin jied bad kata ka dei ka jonglong jong U Blei naduh ba U la buh ia u briew bad ka briew ha ka kper Eden. Ha ka por jong ka jingsynshar katkum ka Ktien jong U Blei, ki khun Israel ki jop ia ka thma kat sha kaba ki leit namar ba U Blei U don ryngkat bad ki namar ba ma U, U dei U Nongynshar bad U Syiem jong ki hynrei hadien ba ki kwah ban ioh syiem hi noh dalade bad kumta U Blei U ai ia ka jingkwah jong ki. Ka jingsngewsih pat ka long ba kim lah ban jop ia ki thma bad ka wanrah jingjop ia ka jingthmu jong ki.

Paralok ha U Trai!!!

1) Hato ngi dang kwah nam ne burom briew?

2) Hato ngi ieid tang ialade?

3) Hato ngi kwah jubor ia ka bym dei ban ioh?

U Blei Un Kyrkhu,

Ha ka kam U Kynrad,