Wan poi u khla thapsim sha khrum ing bad ha ing mane

Shillong, 6 Naitung:
Ha ka miet 4 tarik u naitung kaba dei ka sngi saitjain uwei u khla thap sim u la wan poi ruma ha ing jong ka kong Veronica Khonglah ha ka shnong Dawki. Ka kong Veronica ka la lap ia utei u khla na khrum ing jong ka bad mar kumta hi ka la pyntip sha ki katto katne ki samla bad rangbah katei ka shnong bad hadien ba ki la wan poi ki la kem noh ia utei u khla. Hadien ba la ioh kem ki la pyrshang ban ai bam ia u, hynrei um treh bam eiei kumta ki la leit ban pyllait biang noh ia u sha khlaw ha kajuh katei hi ka miet, ki la leit ban pyllait ia utei u khla ha kawei ka khlaw kaba doh hajan ing mane Katholik Dawki.
Hynrei ha ka step sngi u Blei ka 5 tarik u naitung, la lap biang ia utei u khla ba u la wan phet na khlaw bad leit ban shong khop shadien ka ing mane Katholik. La lap biang ia utei u khla da u bah Angelus Talang uba dei u ba haing jong i kong Veronica. U bah Angelus u la lap ia utei u khla hadien ba la wai jingiaseng namar ba u la ioh sngew ba la don ka jingwiar ksew shadien ing mane bad haba u la leit peit u shem pynban ba utei u khla uba ki la pyllait ha ka por mynmiet u la wan phai biang.
Ha katei ka sngi u bah Angelus bad ka kong Veronica hadien ba ki la ioh kem biang ia utei u khla ki la wanrah noh ia u sha Shillong bad ki la ai ha ki bahaing bahasem jong ki kiba sah ha Mawlai ba kin leit aiti sha ka tnad Wildlife. Hadien ba la pyntip sha ka tnad Wildlife shaphang ka jingioh kem ia utei u khla la wan ban shimti da uwei na ki nongtrei katei ka tnad u bah H.Budnah na u bah Debesiekimin Khonglah.