Maham iaid ‘bym dei’ ki pulit Ri-Bhoi ha 4Lane

Nongpoh, 6 Naitung:
Namar ka jingmlien palat ki nongniah kali ban iaid sha ka bynta bym dei (wrong side) bad ban tur rak rak kaba la wanrah ia ka jingjia aksiden bunsien ha ka surok Four Lane, ki pulit ka Ri-Bhoi ki la maham tyngeh ia ki nong niah ba ki dei ban bud ia ki kyndon niah kali lym kymta kin sa syllad ban ai jingsneng da ka kam.
U Superintendent of Police (SP) ka Ri Bhoi District u Bah Bah Goldenbert G Kharwanlang u la ong ba kito ki nongniah kali kiba ju mlien ban iaid na ki liang bym dei,  lada ki pulit kin iohbat kin pynngat ha ka jingpynsajia kat kum ka ain khlem jingmap satia.
U la ong ba   ka jingiaid khlem akor ki nongniah kali  ka la buh jingma  ia ka jingim ki nongiaid nong ieng, ki briew ba shong kali bad kaba lah ruh ban wanrah ia ki jingiatakhuh kali kiba shyrkhei.
U SP u la ong ba u la bthah ia ki Pulit jong ki tnad bapher bapher ba don ha surok bah  ba kin leh da kaba tyngeh kat kum ka Aiñ ia kiba pynkheiñ ia ki kyndon niah kali.