Wat la don kiba pyrshah, ïaid beit ka jingïalang tih mawshun ha Lumshnong

Shillong:Ka jingïalang bad bishar paidbah ba la pynlong da ka Meghalaya State Pollution Control Board (MSPCB) haba ïadei bad ka jingsngap ïa ka jingmynjur kiba bun balang haba ïadei bad ka kam tih mawshun da ka Star Cement Company ka la kut bad ïaid beit ïaid ryntih khlem kino kino ki jingjia ba sngewsih hapoh Lumshnong ha ka sngi Saitjaiñ.

Na ka liang ka board ka la pynlong ïa ka jingsngap paidbah haba ïadei bad ka jingpynïeng ne buh ïa u 3.3 MTPA da ka company ban pynkiew ïa ka jingpynmih ïa u mawit sha ka 3.3 lak metric ton bad ka dewbilat sha ka 2.0 lak metric ton baroh shi snem.
Na ka liang u Waheh Shnong jong ka Lumshnong, u Monlang Ladong u la ïeng ban kyrshan ïa ka company bad ong ba ka Star cement ka la trei na ka bynta ki kam pynroi hapoh ka thaiñ bad ki nongshong shnong. U la ong ba ka Lumshnong bad ki shnong kiba marjan kin ai jingkyrshan sha ka company.

Ki jingpyrshah halor katei ka kam ka long na ka liang ki sengbhalang kum ka Jaiñtia Students Union (JSU) bad Khasi Students Union (KSU).
Na ka liang u Secretary ka JSU, u Treiborlang Suchen u la ong ba ki kam pynroi kidei ban wan na ki nongmihkhmat bad u la buh jingkylli halor ka jingthmu ba shalyndet halor katei ka jingpynïar ïa ka project jong ka company haba ka district ka duna ki hospital bad ki college.
Na ka liang u President ka KSU Narpuh circle, u K. S. Suchiang ula ong ba ka seng ka pyrshah ïa ka project naba kan pynsniew bad wanrah jingma ïa ka sawdong sawkun bad mei mariang.

Haba pynpaw ïa katei ka juh ka jingsngew na ka liang ki katto katne ki nongshong shnong ki la pynpaw ïa ka jingpyrshah ïa ka project da kaba ong ba kan ktah ïa ka Koit ka Khiah ki nongshong shnong ka Umlong naba katei ka kam tih mawshun ka long hajan ka shnong.

Ki la ong ba ka pollution board ka la ai ka jingmynjur ne clearance kaba 100 per cent jong ki nongshong shnong ka Lumshnong ki ai jingkyrshan ïa ka project, hynrei ka klet ban shim ïa ki jingai jingmut ne mynjur ki thaiñ ba marjan, kiban long ki jingma.
Na ka liang u Deputy Commissioner ka East Jaiñtia Hills, u Abilash Barnawal ula ong ba ïa ka kaiphod jong ka jingïalang sngap paidbah yn sa phah sha ka sorkar Pdeng, na ka bynta ka jingshim rai kaba khatduh.