Plie ka Kong Kei ia ka kamra klas Digital ka Govt Boys

Shillong, 6 Naitung: 
Shi bynta ban rakhe ia ka taiew Digital India, Ka Kong Roshan  Warjri (Kong Kei) ka myntri kam pohiing ka jylla ka la plie mynta ka sngi Nyngkong ia ka kamra klas Digital ha skul Government Boys’ Higher Secondary School, Shillong.
Kane ka dei hapoh ka North Eastern Council’s (NEC)  kaba la pyntreikam da ka sorkar India lyngba ka Digital Classroom.
Haba kren ha kane ka jingplie, ka Kong Warjri ka la ong ba ka jingplie ia ka kamra hikai Digital Classroom ha kane ka skul kan pynkiew shuh ia ka jingstad bad ka jingshemphang jong ki khynnah skul bad ka rukom hikai.  Ka la ong ba ka teknoloji ka pynkylla dur ia ka pule puthi bad ruh ia ki samla pule bad ka pyrthei baroh.
Ka la kyntu ia ki khynnah pule ban shim kabu ban pyndonkam hok ia kane ka lad ba la ioh na ka bynta ka jingmyntoi jongki ha ka jingpule ban saindur ia ka lawei.
Ka Kong Warjri ka la ai mynsiem ruh ia ki nonghikai ba kin trei shitrhem ia ka kam ban kyntiew ia ki khynnah.
Ka jingmut jong ka jingpule kam dei tang ia ka kot ban pynioh mark shibun ia u khynnah hynrei ban saindur ia u khynnah ban pat ban siew kylliang sha ka imlang sahlang.
Shwa ia kane la ioh ruh ia ka jingkren na u Bah D.P. Wahlang u Comssioner & Secretary ka tnad Information Technology uba la ong ba ka buit jingstad teknoloji ka trei borbah ha ka jingpule bad ha kane ka pyrthei stad. 
Ha ka jingialang la donlang  u  A. Ch. Marak u Director ka School Education and Literacy,  Ka kong L.M. Iangap ka Principal Government Boys’ Higher Secondary School,  ki nonghikai bad ki samla pule.
Ha kawei ka khubor, ka BSNL ka la pynlong ia ka jingiakop tainia jong ki samla pule ha St Anthony’s College, Shillong kum shi bynta ban rakhe ia ka Digital India.