Sngew kyndit, ban iohi, ba ka wan ka jing dawa ia ka jing pyn kylla ia ka bhah thung kam; ha ki ophis sorkar, na kawei ka samla pule, katba kiwei ki sengbhalang, kiba mih kum ki tit, kim ju iakren ia kane ka mat, hynrei, ki shu ia beh lut ia kawei ka political issue, kaba dei ka inner line permit (ilp).
Ki seng sain pyrthei ruh, ym i don, u ban iakren ia kane ka mat, hynrei la iohi, kumba u dei tang U bah Adelbert Nongrum, MLA jong ka KHNAM, uba kham pei jingmut ban iakren ia kane ka mat.
Kane ka bhah 40 percent, kam dei tang ha ka ioh kam ioh jam, hynrei ka trei kam, ha ka bhah pule ruh, namar ba lada phah ia ki samla ban pule lain shabar, ki pynieng da katei hi ka nongrim.
Kane ka bhah kam 40 percent ia ki Khasi bad 40 percent ia ki Garo, kam dei satia ka ain, hynrei, ka dei kaba la shu ia thaw shipor, ha ka por jong ka jingioh jylla rilum bad mynta, haba ka Meghalaya, ka la dap 50 snem pura, ka la dei ban pynduh noh ia kane ka bhah bad ka dei beit ban long baroh 80 percent ia ki trai shnong ka jylla, khlem da khein kyrpang ia U Bhoi, U War, U Khynriam, U Pnar, U Achik lane ia kano kano ka kynhun nongshong shnong bad katei ka ain, kan plie lad ia uba bit duh, ba un ioh lad ha ka ioh kam ioh jam, lane ha ka jingleit pule shabar.
La ju lap ba kane ka jing ai bhah kyrpang, ka pyn sahkut ia ka ioh kam ioh jam, ia ka jingleit pule shabar bad wat ia ka jingkiew kam ruh, namar ba lada kim don kito kiba dei na kato ka kynhun jait bynriew, ba kin shimti ia la ka jong ka bhah bad kam dei tang kata, hynrei ka ailad ruh, ba wat ia uba bieit tam, ba un shah thung la ka thung mata madei, tang na ka daw, ban ioh pyndap ia katei ka bhah kaba sah thylli.
Ka jingshim ia katei ka rai, ka la bakla shi katdei, namar ba mynta, ka la sdang long raibi, ha baroh ki skhim sorkar bad kata ka long ba lada plie District kawei ha Khasi, hap ban plie ia kawei ruh ha Garo, lada plie Block kawei ha Jaintia, hangta hap plie sa kawei ruh ha Garo bad lada ka long ha kane ka dur, ka la dei ruh ban don sa kawei ka jing pynbeit kaba donkam bha ha kine ki sngi bad kata ka long ba lada ioh myntri rangbah U Garo, dei ban ai bhah lang ia U Khasi ruh.
Nga ruh nga sngewiahap ia kane