Ka lah ban long ka jingiakren kaba khadduh ki ar jylla, ha ka 29 tarik u Kyllalyngkot

Shillong: Ki arngut ki Myntri Rangbah kata u Conrad K Sangma u ba dei u Myntri Rangbah ka jylla Meghalaya bad u Himanta Biswa Sarma u ba dei u Myntri Rangbah ka jylla Assam kin sa iakynduh ha ka sngi Saitjaiñ jong ka 29 tarik u bnai Kyllalyngkot 2022 ban pyndep bad pynkut noh ia ka jingiakren pynbeit pud pynbeit sam hapdeng ka jylla Meghalaya bad Assam na ka bynta ki hynriew tylli ki jaka kiba don hapdeng ka jingiakajia bad jingiakynad khappud kiba hap ha ka bynta kaba nyngkong jong ka jingiapynbeit pud.

Hadien ba la dep ban shong ia ka jingialang hapdeng ki kynhun Myntri ha ka sngi Thohdieng jong ka 28 tarik u bnai Kyllalyngkot 2022, u Conrad K Sangma u la ong, “Ngi la dep ban iakren bad ki kynhun Myntri halor ka ishu khappud. Ngin sa iakynduh ia u Myntri Rangbah ka jylla Assam lashai janmiet ha ka por kumba 4:30 ne 5 baje eiei ha nongbah Guwahati”.

Shuh shuh u Conrad K Sangma u la ong,”Ngi don jingkyrmen ba hadien ba la kut ka jingialang ngin sa lah ban poi noh sha ka jingiakren pynkut kaba khadduh ha kaba iadei bad kine ki hynriew tylli shwa ki jaka kiba ngi la pyrshang ban pynbeit”.