Na ka 10 lak tam sha ka 34 lak kiew jingbun briew ha jylla, ong ka Agatha

Shillong:Ka dkhot jong ka Parliament na Tura, Agatha K Sangma, ka la pynher ïa ka lama lai rong ka Ri bad ka la shim ïa ka Rashtriya Salute ïa ki 7 tylli ki Parade Contingent ha ka jing rakhe ïa ka 73rd Republic Day Celebration hapoh Matchakolgre L P School Playground, New Tura ha ka sngi Balang.

Ïa ki parade contingent la ïalam da u Parade Commander Pankaj Rasgania ba kynthup ïa ka 2nd MLP Battalion, DEF, Women Home Guard Volunteer, Don Bosco College NCC Senior Division, Female Wing and Junior Wing Contingent bad ka Band Platoon.

Haba kren ha katei ka sngi, na ka liang ka Agatha ka la pynkynmaw ïa ki jingnohsynniang bakhraw jong ki nongïalam ba ïohi jingai jong ka jylla bad ka ong ba dei ban kynmaw barabor ïa ki jingshakri ba la ai da ma ki.
Haba kdew ba ïa ka Meghalaya la phish na ka Assam kum ka Autonomous State ha u Ïaïong, 1970 bad la pynbna kum ka jylla bapura ha ka 21 tarik Kyllalyngkot, 1972, ka la ong ba ka jylla ka la kiew ha kiba bun ki liang ha kine ki 50 snem ba la dep.

Haba kdew katto katne ki kam pynroi ka la kdew ba ha u snem 1971, ka jingbun paid jong ka Meghalaya ka dang long tang kumba 10,11,699 ngut ha kaba ka la kiew shajan 34 lak ha u snem 2021. Ka jingbun briew ka la kiew sha ka 132 ngut ki briew sha ki sq. Km ha u 2011 na ka 45 persons sq. Km ha u 1971 katba ka pule puthi ka la kiew sha ka 74 % ha u snem 2011 na ka 29%. shuh shuh ka jingïar ka surokbah ne National Highway ha ka jylla ka la long palat 1,100 Km mynta kaba dang long tang kumba 150 Km ha u snem 1972, ka la ïathuh ba ka jingbuh ïa ki jaka ring bording ilektrik ne power generation capacity ha ka jylla ka la kiew arshah da palat 500% na ka 60 MW sha ka 353 MW ha ka por mynta.

Haba ïadei bad u pud u sam bad ka Assam, ka la ong ba ka sorkar jylla ka don jingmut baskhem ban pynbeit noh bad ka Assam bad kaba dei ka jingïakajia kaba lah sahteng bha bad mynha ka 20 tarik mynta u bnai baroh arngut ki Myntri Rangbah ka Meghalaya bad Assam ki la kynduh ïa u Myntri ka tnat Kam Pohïing ka sorkar Pdeng ha Delhi ban pyndep shwa ïa ki 6 tylli ki jaka ïakajia, ka la ong ba nalor kitei, ka Koit ka Khiah ka la long kawei pat ka mat ba kongsan ba ka jylla ka la kiew bha.