Shillong:Ka Ri-War Mihngi Football League ba la tip ruh kum ka Olim Singh Syiem Memorial Trophy ha kaba ia ka Zone B la lah ban pynlong ha madan Mawryngkang. Uba la wan ban plie pyrda ia kane ka Trophy u dei u Sordar ka Raid Mukertila u bah Phren Kongwang.
Ha ka jingplie pyrda, u Sordar u la kyntu ia ki nongialam jong ka Association ba kin ym man thait ban kit ia ka kam bad ba kin pynlong ia kum kine ki jinglehkai man la ki por namar ka ai mynsiem bad ka pyniajan ia ki samla ka thain ban ia long kawei. U la ong ruh ba ka jingpynlong ia ki jinglehkai ka pynlait ia ki samla na ki jingsniew kiba bun bad ban pynmih ia ki player na kine ki thain. Na ka liang jong u, u la pynpaw ba un ai ka jingkyrshan ia kane ka Association ba la lam khmat da u bah Dewi Khonglam.
Ha ka sngi plie pyrda ia kane ka Trophy kata ka 21 u Kyllalyngkot 2022, ka Pomshutia Sc ka la pynliem ia ka Mawryngkang Sc da 2 kol la iwei, katba ka Umkrem Sc ka la pynliem ia ka Pashum Sc da 3 kol la kawei.
Ia ka jingialang la pyniaid da u bah Amir Khongmalai bad la ioh ka jingkren na u Rangbah Shnong ka Mawryngkang u Bonison Umsong, u President bah Dewi Khonglah, u General Secretary barim u bah Don Khonglam bad u Bah Honroy Khongsdir u Sordar ka Raid Mawja.
Phi don ban ong eiei?