Husiar na ki nongthok die ksiar tad, ong u SP

Shillong, 01 Naitung: 
U SP (Crimes) ka East Khasi Hills u Bah Vivek Syiem u la kyntu ia ki paidbah ban husiar na ki nongtyrwa ba kiba leh mynleh tyrwa ia ki ksiar tad namar ba kine ki dei ki nongthok ban shukor ia ki paidbah.
Haba pynmih ia kane ka khubor, u SP u la ong ba la ioh jingtip ba don ki briew kiba phun kiba kam ba dei na Lakhimpur District,ka Assam ba ki thmu ban die ia ki ksiar ha ka dor kaba tad.
Ki paidbah ki dei ban husiar ia kine ki jingpynbiej namar ba ki nongphun ki dei ki runar ban lute pisa  bad ka buit jongki, ka long ban rahbor ia ki briew ban pynlait pat hadien ba  la siew ia ka pisa.
Katto katno ki briew ki la don kiba ngop ha kane ka jingtyrwa pynbiej jong kine ki runar bad ki dang jah klep haduh kine ki sngi khlem pat lapdien bad ki pulit ka Assam ki dang pynlong ia ka jingthwet ia ki, la ong u Bah Syiem.