Ei DC, U Syiem aiu lih uba wan?

U Himanta Biswa Sarma, myntri rangbah ka Assam, ula dumok tyngeh, ha ki khyndiat sngi ba ladep, ia U Deputy Commissioner jong ka Nagaon District, ba u pyn sangeh ia ki kali paidbah, ba kin iaid, na ka bynta ban ailad ia ka kali jong U Sarma bad ha ki kyntien jong U MR ka Assam, u ong “Ei DC, U Syiem, aiu lih uba wan?”

Katei ka jingleh jong U DC (la imat), kumba kam pyn sngew tynnad satia ia U Sarma bad kumta, ula hiar hi napoh kali ban mai ia U DC ha khmat jong ki paidbah bad khlem pep, ka la long ka jinglehrain, kaba jur ia utei u ophisar heh, ban shah mai ha surok ha u myntri rangbah.

Ha shwa jong kane, U Sarma, ula dep rai ruh, ban pynduna noh ia ki pulit pahara jongu, da mar shiteng bad ula weng ruh, na kaba phah pahara ia ki myntri rangbah barim ka jylla Assam.
Lada iakren ia ka jing bun kali, ka Assam, ka palat da ki spah shah, ia ki kali ka Meghalaya bad lada iakren ia ka jing khapngiah ruh, ka long hi kumta, hynrei lada u myntri rangbah ka Assam, u bitar, ban pyn sangeh ia ki kali paidbah, wat haba u dang iaid lynti, na kano kano ka jaka, kumta ha Shillong, lei, kan don jingmut aiu, ban khang ia ki kali paidbah, ban kaweh kti ia ki kali paidbah, haba iaid kitei ki heh ki hain.

Ym tang katta, la ju shim ruh ba ki nongniah kiba niah ia ki kali jong ki myntri sorkar, kim dei satia, ki nongniah kali paidbah, hynrei ki dei kiba la pyntbit kyrpang ialade bad kitei kim dei ban pynwit ia ki kali paidbah, haba ki iaid ki ieng, hynrei, ki dei ban iaid, ia la ka jong ka lynti; hynrei, kaba sngewsih, ka long ba ha ki khyndiat sngi ba ladep, la iohi, ba kawei ka kali pahara jong u myntri kam poh iing, ka la lymbub briew bad pyniap syndon, ia uwei u nongniah scooty, uba don ha ka jingiaid lynti jongu.

Kane ka rukom khang lynti ia ki riew paidbah, ka jia bha ha kine ki sngi, ha ka nongbah Shillong bad ha kiwei ki jylla jong ka India bad ka la dei ia ki bor sorkar, ba kin shim ia ka nuksa jong ki ri sepngi, ba ka leit ka wan jong ki riew paidbah, kam dei satia ban thut wat tang shi sekhon ruh, da kaba ailad ia kitei ki neta, ba kin iaid katba ki sngew bit bad leit beh ia ki prokram politics ne ki jingleit kai shang suwari jongki lem bad la ki jong ki khun ki tnga.