Ka politiks, na kajuh ka iing

Ka sorkar U Narendra Modi, kham mynshwa, ka ju kynnoh har rukom, ia ka seng Congress, da kaba ong, ba ka dei ka seng, kaba pyniaid da kawei ka iing, lane kaba ki ong ka iing ki Gandhi.

Ym tang katta, hynrei nalor ka jing kynnoh ia kawei ka iing, ki la ju kynnoh ruh ia ka nong Italy, kaba synshar ia katei ka seng bad katei ka dei ia ka Sonia Gandhi, ka kmie U Rahul bad ka Priyanka Gandhi.

Mynta kane ka sorkar, ka la jan kut biang ka por trei kam jongka, hynrei, ym iohi, ba kan thaw ia kano kano ka ain, kaba khanglad ia kawei ka iing, ba kan shim bynta ha ka politics lane kaba khanglad ruh ia ki briew kiba kha na shabar Ri, ba kin trei politics ha India.
Ban da dei, ba ki don kine ki ain, te khlem pep, tang ha Meghalaya, kin jin da la ioh bun ngut ki ban long ki MLA/MDC/MP, namar ba ka Garo hills, lei ka la dap, tang da ki Sangma U Conrad ki Sangma U Mukul suda bad ha Ribhoi bad Jaintia hills, ki la dap sa ki iing jong ki Dhar suda.

Ha Garo hills, ngi don mynta ia u myntri rangbah, uba na kajuh ka iing, u myntri sorkar ruh, uba dei u hynmen jong u myntri rangbah bad ka MP ruh, kaba dei ka para jong kitei hi ki arngut bad lada iakren ia U Mukul Sangma, lei, nai ia niew shuh, naduh ki khun ki tnga, ki para bad ter ter.
U Narendra Modi, uba la thaw ia ki ain kiba bun, kynthup ia ka ain nongrep, kaba u hap ban weng noh hadien shisnem, ula dei ban iaid noh ha kane ka kynti, ban thaw ia katei ka ain, kaba khanglad ia kajuh ka long iing, ba kan shim bynta ha ka politics bad katei kan ailad ia ka jing ia sam ia ka spah politics, hapdeng ki nong shong shnong bad kam dei satia, tang ia kawei ka long iing bad ka ailad ia kiwei, ba kin ioh ialeh elekshon bad ia long nong mihkhmat, khlem da shah khanglad tang ha ka longiing jong ki Gandhi ne ki Sangma.

Ka por kam ap shuh, namar ba ka elekshon, ka la jan poi artad bad lada ka sorkar India, ka thmu shisha ban pynduh jait, ia katei ka kam politics, kaba synshar lynter taid, da kajuh ka iing, kan hap ban pyni noh da ki kam bad kam dei shuh ban shu thad madan, tang ha rynsan elekshon, khlem da pyn urlong, da ka ain kaba iahap shisha.