Khlad ha shen ka longkmie, ba iuh ka trok ha Pahamrioh

Nongpoh: Ha kawei ka jingjia shah iuh kali, kaba la jia hynnin ka miet ha surokbah NH-6 bad kaba hap ha shnong Pahamrioh, kawei ka longkmie na ka shnong Mawsyntai, ka la khlad noh hashen, hadien ba ka la shah iuh ha kawei ka trok, kaba ym lah ban tip ba ka dei ka trok kaba naei.

Katei ka jingjia, ka la jia hynnin ka miet ha ka por 12 baje ei ei shiteng synnia, ha kaba la ong ba katei ka Longkmie kaba shong marwei ha katei ka scooty kaba don ia u number AS 01BJ 5904, ka dei kaba mih na Nongpoh ban leit sha Byrnihat, hynrei haba ka la poi ha Pahamrioh, ka la shah tynrah ha kawei ka trok bad ba ka la shah iuh ha ki bynta ka khlieh, kaba la pynlong ia katei ka Longkmie ba kan khlad noh hashen.