Ujor ejahar ka shnong Barapathar, ia ki runar ba pynpra ia u Mawnongrim

Nongpoh: Ki nongialam ka shnong, ha ryngkat ki nongkitkam ka VEC Barapathar lem bad ki paidbah na katei ka shnong, ki la ujor da ka Ejahar pyrshah ia ki runar, kaba la kynnoh ba ki dei na Assam, halor ka nongrim ba ki la wan ban pynpra dusmon ia u Mawnongrim jong ka jingpyntrei ia ka skim MNREGA hapoh katei ka shnong.

Ha shwa ba kin leit buh ia ka Ejahar sha Pillangkata Police Outpost, ki briew na katei ka shnong, ki la pynpaw da ka jingiasoi paidbah, kaba long ba ki pynpaw ba lada ki Pulit kim lah ban kem ia kitei ki runar, kiba la wan pynpra dusmon ia utei u Mawnongrim, kaba mut ba kim suk shuh da lei lei ruh em.

Nalor katei ka ejahar, ki briew na katei ka shnong, ki la kyntu ruh ia ki briew ka Ain, ba ki dei ban leit kem noh mardor ia ki briew kiba la leit pynpra ia u Mawnongrim, uba pyni halor ka jingpyntrei ia ka surok iaid kjat, kaba la pyntrei lyngba ka skim MNREGA hapoh katei ka shnong.