Pynduh noh ia ki prokram ot ribon

Ki kam ot ribon, ki la shim shibun ka por jong ki nongialam paidbah bad la iohi, ba U President, u myntri rangbah duh bad shibun ki myntri ka sorkar India, ruh, ki ia bunkam man ka por, ia katei ka prokram ot ribon.

Ka jylla Meghalaya, kam shym la sahdien satia, ha katei ka mat bad la ju iohi, ba ki heh sorkar, ki ia bunkam ban ia mareh wiaw wiaw sha ki shnong bapher (khamtam ha kine ki sngi, ba la jan ka elekshon 2023), na bynta i prokram iba shi kynta, hynrei, iba la donkam ban pynriam pynbeit lypa kumba ar lane lai sngi bad nangta ban sa pynpra biang ia kitei ki rynsan, kiba shimpor, hi sa ar, lai sngi lem bad ka jinglut jingsep, kaba bun.

Hynrei, ka mat, kaba hap ban iakren, ka long, ia kaei ka jing donkam ne long kyrpang, kitei ki prokram ot ribon, ki prokram buh maw nongrim bad kumta ter ter bad la ki iaid kham stet lane ka jingtrei ka long kham bha bad kaei kaba don hadien jong kiba kum kitei ki prokram jong ka sorkar bad kam kut tang katta, hynrei, ka wan sa kawei pat ka mat bad kata ka long, ba la iohi, ba ka jing dait buid kti, kaba don ha ki MLA/MDC bad ki nongialam, ba ki don ki khep, ba ia ki lynti iaid kjat, ki pain khana, ki jaka shongkai kiba rit ba ria, ba la ju pyn lut sngi, ia u paidbah, ban ia thab kti bad ia dih sha saw lane sha suda.

Baroh ngi ia tip shai, ba ka surok, kan dei hi kajuh ka surok, ynda la trei pyndep ia ka bad kan dei hi kaba bit, ban iaid kali (kat kum ka jing pynlut jong ka tnat sorkar) bad kumjuh ia ka lynti iaid kjat, ka jingkieng iaid kali; lane kino kino kiwei pat ki skhim jong ka sorkar, kin long hi, kumba ki dei ban long, lada ot ne khlem ot ribon ruh, khamtam, haba ki nongpeit, ki kitkhia ban buddien ia ka rukom trei ia ka kam.

Ka la dei ban don ka jing pyrkhat thymmai, halor kane ka mat, khamtam ha kaba pyn bunkam ia ki riew paidbah, namar ba ki paidbah, ki duh sngi duh ia, ki duh bainong bad ki shu pynlut kai ia ka por jongki, ha kitei ki jait prokram, bym don jing myntoi eiei ruh em bad kim ia dei satia, na kaba long ki myntri sorkar, lane ki ophisar, ba kat shaba ki iaid, ki ioh ia la ka jong ka tulop, ka bai petrol, bai bam bai dih bad ki pyngngad ka met ka phad, haba ki poi sha ki nongkyndong bapher.