Puk khie bitar ki paid khappud, ba shah pynpra u mawnongrim ha Barapathar

Nongpoh: Mynta ka sngi ha ka por 11 baje ei ei mynstep, ki paidbah hapoh ka shnong Barapathar, Mawiong lem bad kiwei, ki la mih paidbah ban pyrshah halor ka jingshah pynpra u Mawnongrim ka Meghalaya ha shnong Barapathar, kaba la shah pynpra hynnin ka sngi ha ki briew kaba la kynnoh ba ki dei na Assam.

Katei ka jingkhie bitar ki paidbah, ka la jia ha ka por ba ki Pulit Meghalaya bad Assam ki la poi ha katei ka jaka, ha kaba ki paidbah kiba la lum khrui, ki pyrta pyrshah ia ki Pulit, da kaba ong ba ki dei ban kem noh mardor ia ki briew kiba donkti ha ka ban wan pynpra ia utei u Mawnongrim.

Ki briew na katei ka shnong, ki la ong ba katei ka jaka, ka dei kaba hap ha Meghalaya, Raid Marwet, Hima Mylliem. Haba iadei bad katei ka jingshah pynpra ka Signboard ha shnong Barapathar, ka shnong ka la ujor da ka Ejahar ha Pillangkata Police Outpost, ha kaba ki la dawa ba dei ban kem noh mardor ia kitei ki riew dusmon kiba la pynpra ia utei u Mawnongrim bad kaba la jia hynnin ka sngi.

La lah ban tehlakam ia katei ka jingbitar ki paidbah, ka dei tad haduh ba la poi u Bah R. Kharbihkhiew, Border Magistrate ka Ri Bhoi, nangta u Dr. R. Nongrum, BDO ka Umling Block lem bad kiwei.