“Bah Ronnie” leh la ka kam, wat shu kylla niangkohnguh rHalor ka jingshim jaka ki shipai, ong ka UDP

Shillong, 28 Jylliew:
Hadien ka jingmih khubor ba u MLA ka Mylliem Konstitwensi u bah Ronnie V Lyngdoh um don jingtip eiei, ia ka jingthmu die jaka ka sorkar ia ka jaka kaba heh 18 akar kaba dei ka jaka ka tnad ri jingri kaba don ha 7 mer Upper Shillong sha ki shipai suin, ka UDP Mylliem Konstitwensi lyngba u President jong ka, u bah Hamlet Dohling ka la thoh da ka shithi sha u bah Ronnie V Lyngdoh, MLA ka Mylliem ha kaba u la bsuhlang ruh ia ka kopi kaba la pyni ia ki rai jong ka jingialang ba 19 ka Rajya Sainik Board Meghalaya kaba la long ha ka 4 tarik u nohprah, 2014 bad ka la suhlang ruh ia ka memorandum kaba ka la phah sha u myntri rangbah ka jylla ban pyrshah ban lilam ia katei ka jaka. Lah ban kdew ba ha ka jingiakren bad ki lad khubor u MLA ka Mylliem u bah Ronnie V Lyngdoh u la ong ba katei ka khubor ba la mih ba ka sorkar kan ai jaka sha ki shipai suin ka dei tang ka khubor hamsaia kaba thmu ban ialam bakla tang na ka jingmyntoi jongno re jongno shimet bad u la ong “Nga kren ia kane da ka jingtip bad ka jingthikna ba kam don kano kano ka jingthmu ban ai jaka sha ki shipai suin”.
Lah ruh ban pynkynmaw ba u bah Ronnie u la ong “Lada don ki bym ngeit ia kane, kan bha ba kin leit pan jingtip da ka RTI na DC revenue ne na u Chief secretary ka jylla” , utei u nongmihkhmat ka Mylliem kham mynshuwa u la ong ba kumno ki briew ka tnad ri jingri ryngkat ki sengbhalang, ki Rangbah Shnong ki nud ban leit jurip ia katei ka jaka haba kam don kano kano kaba kum kata ka jingthmu die jaka. U bah Ronnie ha katei ka por ba ia kren bad ki lad khubor u la ong ruh ba lada dei ba ka don kaba kum katei ka jingthmu ka dei ban iaid lyngba ka tnad Revenue lyngba u DC, u la ong biang ba ka don eiei sha lyndet ka ban pyntieng kohtympan ia ki paidbah. Haba ther kylla ia katei ka jingkren u bah Ronnie V Lyngdoh, u bah Hamlet Dohling ha ka shithi ba la phah sha u u la ong , “Ngi pyntip sha phi ba phin tip bad leh la ka kam ym ban shu kylla niangkohnguh katba pyniaid ka sorkar u myntri rangbah”.
Nalor ka kam jaka bad ki shipai, u bah Hamlet u la thoh ruh sha u MLA ia ka jingpynbna khubor ka MUDA ba ka Lawsohtun,Lummawbah,Umlyngka bad Nongkseh kan hap noh ha ka jingpeit ka MUDA kata ba ka Meghalaya Building Byelaws 2011 kan treikam ha kitei ki jaka bad ki paidbah ki dei ban kongnguh ia ki kyndon ka Meghalaya Building Byelaws 2011, ba u MLA un leh ia kaba donkam.