Liem ar ki lehnoh, shah kem 4 ki NDFB na Byndihati

Jowai, 28 Jylliew:
2 ngut ki lehnoh ki la kyllon iap, katba 4 ngut pat ki la shah kem ha ki ar tylli ki jingjia ha ki ar jaka ha ka por ba ki pulit bad ki shipai ki la leit ban khynra lehnoh mynta ka sngi u Blei. Ha katei ka jingjia ka khubor pulit ka la kam ba ki la ioh ban kurup ia ki tiar pynbthei kiba khlain bor.
Ka jingjia kaba nyngkong ka dei ha North Garo Hills ha kaba ki shipai 19 Dogra Regiment ryngkat ki pulit Meghal aya, hadien ba ki la ioh jingtip shaphang ka iaid ka ieng ki kynhun lehnoh kiba kim shym la tip ki dei na ka seng aiu, ki la leit ban khynra ha ki thain ka Pach Kilo kaba don ha North Garo Hills.Ka Pack kilo ka dei ka jaka kaba jngai kumba 300 kilomitar na ka nongbah Shillong.
Katba ki shipai bad pulit ki dang don hapdeng katei ka jingkhynra kynsan kynsan ki lehnoh ki la ther kuli na ki jaka barieh bad ka jingiather kuli markylliang ka la neh kumba katto katne por bad ha ka jingialeh, ar ngut ki lehnoh ki la kyllon iap, iathuh u Inspector General of Police GHP Raju haba kren sha kawei na ki lad khubor. Na katei ka jaka kyllon iap ki pulit ki la ioh kurup 2 tylli ki pistol bad ki kuli, kawei ka mobile phone bad lai tylli ki Sim Card bad bun ki kot ki sla bad ki dawai.
Ha kawei pat ka jingjia, la iathuh ba ki pulit ka East Jaintia Hills District ki la ioh ban kem ia 4 ngut ki nongialam bad dkhot ka seng lehnoh NDFB ha ryngkat uwei u nongkhaii tiar pynbthei na ka shnong Byndihati mynta ka sngi, dangstep phyrngap sngi U Blai.
U SP ka East Jaintia Hills u la iathuh ba hadien ka jingioh jingtip ba thikna shaphang ka jingdon kitei ki dkhot ehrang kiba leh mynleh kum ki nongbylla dewiong ki la pynlong ka jingkhynra bad ioh kem ia kitei ki 4 ngut bad utei u nongkhaii.
Kitei kiba la shah kem kidei ki ba la tip kyrteng kum u Santosh Kharkekary uba khot sin kum da ka K. Shimang uba dei u Dy. Commanding Officer jong ka 3rd. Bn NDFBF/S, u Bolashi Boro Commanding Officer jong ka 13th Bn ha ryngkat ki ar ngut ki dkhot kynthup ia u  Gambor Gayari bad Deimalu Basuma tary. Ia utei u nongkhaii pat la tip kyrteng kum u Baisa Deb Verma. Ki pulit ki la ioh ban kurup  144 ki bakhor (gallantine sticks) bad  126 tylli ki Tikli (detonators)