La jan poi sha ka jing ia mynjur kam pud, ki myntri rangbah ka Assam, Meghalaya

Shillong: Ka Assam bad ka Meghalaya, ki la jan poi sha ka jing ia beit halor u pud u sam, ha ki hynriew tylli ki jaka ia kajia khappud.

Hadien ka jing ia kynduh hapdeng ki arngut ki myntri rangbah ka Assam bad ka Meghalaya, kaba long mynta ka sngi ha Guwahati, U Bah Prestone Tynsong, Deputy Chief Minister, u iathuh ba ka jing iakren, ka la jan poi, sha ka jing ia beit jingmut lang jong ki arliang mamla.

“Kan dang don sa kawei pat ka jingialang, hapdeng ki arngut ki myntri rangbah bad hadien kata, kin ia kynduh ia u myntri kam poh iing ha Delhi, ha shwa ban pynbna ia ka jing iamynjur jongki, ha ka 20 lane ka 21tarik Kyllalyngkot” ong U bah Tynsong.

Ki hynriew tylli ki jaka ia kajia, ki long ka Tarabari (4.69 sq km), ka Gizang (13.53 sq km), Hahim (3.51 sq km), Boklapara (1.57 sq km), Khanapara-Pilangkata (2.29 sq km) bad ka Ratacherra (11.20 sq km).