Ka jingkieng Umpling, kaba T.4.35 klur, yn pyndep ha U Lber, ong U bah Charles

Shillong:Ka jingkieng double-lane Umpling ka ban pyniasoh ia ka Shillong bad ka new- Shillong ka ban iaid lyngba ia ka shnong Umpling, yn lah ban plie noh ha u bnai Lber mynta u snem; ia kane la iathuh da u Bah Charles Pyngrope u ba dei u Chairman jong ka Assembly Public Account Committee (PAC).

Lah ban kdew hangne ba ka jingpyntrei ban pynheh ia ka jingkieng Umpling sha ka double Lane kaba la pyntrei mynta kumba lai snem eiei. Na ka liang ka PAC mynta ka sngi ka la leit ban khmih ia katei ka jingkieng double-lane bad ia ka surok kaba pynkynduh ia ka Shillong sha New Shillong.

Haba ia kren bad ki lad pathai khubor na ka liang u bah Charles Pyngrope u la ong ba ka la don ka jingslem ban pyndep ia kane ka jingkieng, hynrei kane ka dei na ka daw ka jingwan jong ka khlam COVID -19, hynrei ia kane ka jingkieng la khmih lynti ban plie bad ban pyndonkam noh ha u bnai Lber 2022.

U bah Charles u la iathuh ba kane ka jingkieng kan long ka ban pyniasoh ia ka Shillong bad ka New Shillong lyngba ka Umpling bad kan dei ruh ka jingkieng ban weng ia ka jingdheng kali, khamtam ia ki kali ki ban iaid sha ki thain NEIGRIMHS bad ka jingkhlain jong kane ka jingkieng ka long haduh 70 MT.
U bah Charles u la iathuh, ba wat la ka jingpyntrei ban pyndep ia kane ka jingkieng ka long kaba la kham shim por, hynrei ha ka jingpyntrei ia kane ka jingkieng kam shym la don kano kano ka jingpyndonkam bakla ia kane ka skim kaba kot sha ka T.4.35 klur.
Halor ka jingtrei ia ka surok u bah Pyngrope u la ong ba ia ka jingpynmang pisa na ka bynta ban pynbha ia kane ka surok lah dep ban pynmang lypa bad don ruh ki kam ba lah iaid sha khmat.

“Ngi la ioh jingtip ruh mynta ka sngi, ba baroh ki skim ba la dep phah sha ka sorkar ban pynbha, ban shna ia ki surok, la aiti sha ki Contractor kaba long ruh kawei na ka sienjam kaba bha, bad mynta ka shong ha ki Contractor ban sdang ia ka kam” la ong u Bah Charles Pyngrope.

Haba kaba ia dei bad ka surok ban leit sha New Shillong, u bah Charles u la ong “Ia kine ki surok ym ba la shna tang na ka bynta jong ki briew ka Nongrah,ka Umpling lane iano iano, hynrei ka dei ka lad ban pynduna ia ka jingkhapngiah bad ka jingdheng kali bad ngi hap shim khia kyrpang halor kine ki surok”.
Ka PAC mynta ka sngi ka la hiar ruh ban leit jurip ia ka jingpyntrei jong ka Nongrah Water Supply Skim, kaba la sanction naduh u snem 2017 -18 kaba kot sha ka T5.35 klur.