Shu bam pih ki nong Assam

Ngi kam ialade, ba ngi dei ki nong Meghalaya bad ngi dei na ka jylla riewlum, hynrei kaba lyngngoh, ka long ba ka kyrteng, te dei riewlum, ki kam pat ki long jylla riew bad ka daw, ka long ba ngi shu ap kmang lane shu pynbam pih ia ka Assam bad katei ka pyn pyrkhat, ba ha ka jingdon 50 snem ka jylla, ngi la lah ne em ban pyndap ialade.

Ki nongri dohkha, ki ujor, ba ia ki symbai dohkha, la wan pynpoi duna dor, da kiba ri na Assam, ki nongri syiar, ki ujor hi kajuh bad la iohi, ia ki kali kiba na Assam, kiba leit die syiar sha ki shnong ba sha kyndong tam jong ka Ri Khasi Jaintia.
Ki nongshang kai pyrthei, ki leit on bad leit shaw, da ki kali Assam bad ha kine ki sngi, ngi iohi, ba ki jaka shangkai ha Sohra bad Dawki, ki la tap lut, da ki kali na Assam.

Ki kotkhubor, ki wan da kiba na Assam, ki wan pynmih kot khubor ha Shillong bad ki ioh kit buk buk ia ki jing pynbna na ka sorkar Meghalaya.
Ki mobile kompeni, ki karkhana dewbilat, ki shu pynlong ia ka Ri Khasi Jaintia, tang kum ka jaka sam sim card, ka jaka khlong dewbilat lane ka jaka lum pisa; hynrei tang ia ki trok kit dew bilat ruh, kim don ki trok Khasi, hynrei ki ia kit buk buk da ki trok kiba na Assam suda.

Peit kai sa ia ki Bank, naduh ki Bank sorkar, haduh ki Bank jong ki riew shimet, la shlei mam, da ki khar Assam suda, khamtam ha ki kam kiba kham heh.
Ka Meghalaya, ka la dap 50 snem bad ngi nang mut, ba ka la ieng ha la ki jong ki kjat, hynrei imat, lada ym don ki khar Assam, ki khohwah jongngi, ki dang jem nior nior bad ngim lah ban kyrshan dalade ialade, namar ba wat, tang ban ia bam doh syiar ruh ngim ioh, ban ia kren mobile ruh ngim ioh, ban ia plie Bank ruh ngim lah ban ban ia thied dew bilat ruh ngim ioh.

Kine ki jingtlot kiba don ha ka jinglong jingman jong ka jait bynriew, ki pynlong ia ka Assam, ba kan nang nion jem suki suki bad kaba lah ban pyn kylla ia ka niam ka rukom, ka rukom bam ka rukom dih bad ter ter bad kum ka jingsdang ka Assam, ka la khyrwait shwa na ka bam doh masi bad ki la don sa shibun ki dak ki shin, jong ki kam lehbor jong katei ka jylla, kiba ngin sa kyndit bynriew, ynda ka por kan dier noh.