Shah pynjulor sa ki jaka mane blei

Tang shi taiew ruh, ym pat don, la leit lushia ia ka kam shakri blei jong ki nongshong shnong ka jylla; kawei ka dei, halor ka jing pynriam Khristmas ha Red Cross Laban bad nangta sa kawei pat, ka dei sa ka jaka mane blei ki Hindu ha Mawbah.

Ba kan da long kumne, ka pyni, ba ka jinglong jingman ha ka nongbah Shillong, kam iapher shuh, na kaba long ha kiwei ki nongbah jong ka India, ha kaba ki don ki kynhun shit niam, kiba da im sngi, tang ban leit pynthut ia ka kam shakri blei jong kiwei pat ki kynhun niam, khamtam ia ki kynhun rit paid bad kitei ki la paw tyngkrein ha ki khyndiat sngi jong ka jing pynkhreh ia ka Khristmas.

Ngim tip na kano ka daw, ba ka mih kane ka jing leit jrong kti, ia ka jingngeit blei jong kiwei pat ki kynhun bad ki jingjia, ki lah ban pyni ba ki don ki riew shim kabu ban pynmih ia ka jing ia sngew niam lane ioh lehse, ba ka don ka jingthmu kaba jngai ban tied jingkhang sha ka sorkar India, na ka bynta ban thaw ia ka ain, ban khang ia ka jing kylla niam, kumba la leh ha kiwei ki jylla.

Ka Meghalaya, ka dei ka jylla, kaba shongsuk tam bad kaba bat pyrkhing ia ka jing laitluid jong ka jingshakri blei jong u briew shimet, katba kum ki artikel 25,26 jong ka riti synshar bad kam ju don ka jingleit pynjot pynpra ne pynwit ia ka jingngeit niam jong kiwei pat bad haduh mynta, hynrei lada ka sorkar jylla, kam lah ban khanglad ia kine ki kam pynshit, kiba la jia ha ki khyndiat sngi ba ladep, kumta, kan ailad ia kiba bun ki riew shim kabu, ba kin leit prong tuh sha ki jaka mane blei bad pynmih ia kine ki jing sngew iapher niam ha ki sngi ban sa wan.

Ha kiba kum kine ki sngi jong ki jingmih jong ki kam shit niam, ha ki bynta bapher jong ka Ri India, kumta ka la dei ia u paidlang ka Ri Khasi Jaintia, ba un pyni, da ki nuksa ba bha, ba ka jingngeit niam, kam dei ha ka jingshah pynbor ne ka jingshah pyntieng ha kiwei pat; hynrei ka dei ka kam shimet lane ka jingsngewthuh shimet jong u briew halade bad ka artikel 25, ka kren shai ia katei ka mat, da kaba ong “freedom of conscience and free profession” bad ngi dei ruh ban sngewthuh ba ngi don ia ka tynrai longbriew kaba sha palat ka niam bad ngi iatylli kum ka jait bynriew ha ka tip kur, tip kha bad ka hok ka shi kyntien.