Ki um ba shngiam ka Ri Khasi

Ka jaitbynriew Khasi, ka don la ka jong ka khana pateng jongka bad lada iakren ia kane ka mat, ka jylliew shi katdei, namar ba ngi don ia ki riew shlur, kiba ka jait bynriew ka la pynmih, ki khana kiba donnam kiba iadei bad ka jinglong jingman ka jaitbynriew bad nangta sa ki jaka ba pawnam, ki dustur riti, ka kamai kajih, ka ioh ka kot bad kumta ter ter.

Mynta ka wan ka mat, ba haba ka don ka dustur riti ba kyrpang jong ka Kongthong; ka India, ka kam trai bad ka kob sob sha kylleng ka pyrthei, nangta haba ka khuid khrik khrik ka um ha Wah Umngot; hangta ruh u myntri rangbah duh u sngew sarong; nangta haba ka jur slap tam ha Sohra, hangta ruh ka rung ka jingpule ha ki kot Geography, ha kylleng ka India bad ka pyrthei.

Hynrei ki nongdon bynta lane, kumba ju kren ha kine ki sngi, ki stakeholders ki dei ban sngewthuh ba kitei kiei kiei, kim jia long tang ha ka shisngi bad kim shym la roi ne kylla dur ruh ha kine ki 75snem ba la iaid, hynrei kitei ki la don da ki pateng bad ki bun pateng briew bad ki la don ia la ka jong ka jingroi dalade hi, lyngba ka jingtrei kaba la sei da ka bor maian jong ka mariang, kaba thaw dur ia ka Ri Khasi hi baroh kawei.

Ha kine ki sngi, haba ngi shu peit, ngi sdang ban ima shibun eh, namar ba ka ju don ka jingong, ha ka ktien ia kren khynraw “beauty is to see, but not to touch (ka jing bhabriew, ka dei tang ban peit, hynrei, ym dei ban ktah)” lane lehse lah ruh ban ong, ba ia u syntiew lah ban shu kheit, hynrei, ym ban jynrat pat ia u dieng.

Mynta ka la don ka jing ia khleh khawlang bad ka jing ia milai jaktung, ka bym ithuh ithaw shuh, lada dei ha Kongthong, ha Sohra lane ha Dawki bad ha kane ka jing ia kyrshut bad ki har rukom; ka jingkhraw nam jong kitei ki kyrteng haneng, kan neh, sa tang katno slem te; hynrei kan sa poi ka por, ba ynda haba kiba nabar, ki la ngiah bad ki la jlep, ba ki trai shnong, kin sa peit da ki ummat kthang, sa tang ia ka jaboh bad kaba tam kyntait.
Ki trai shnong jongngi, ha kine ki sngi ki shu peit jawdud, ia ki jing tyllun jong ki jingjia kiba man ka sngi bad lah ban ong ruh, ba ia mynta, ngi la die noh ia ka dud bad ka malai bad kaba ima, ioh kan sah sa tang ka doi.