Shillong: Lehse kan long ka khubor ka ban pynher syrngiew ia kiba bun, ba haduh san ngut ki briew ha ka jylla Meghalaya, mynta ka sngi la shem ba ki don ia ka jingpang Covid-19 (Omicron).
Na ka liang u Dr Aman War Director ka tnad ka koit ka khiah, u la pynthikna ia kane ka khubor ba mynta ka sngi la lap ba san ngut ki briew ki don ia ka jingpang Covid-19 (Omicron).
Kine ki san ngut ki kynthup ia ki ar ngut na Saiden Ri Bhoi District, uwei na Langkyrding, uwei na Happy Valley bad u wei na Laitumkhrah.
La iathuh ba ki lai ngut na East Khasi Hills district ki dei kiba dang shu wan na shabar, kynthup ia uba na Langkyrding u ba dei u nongwan jngoh kai na ka jylla Assam.
Kat kum ka jingai jingtip ki bor synshar District ka Ribhoi, ki la iathuh ba ki ar ngut ki briew ki ba na Saiden kim dei satia kiba wan na shabar hynrei la ngeit ba ki dei ki ba la tip kum ki ILI cases.
Lah ban kdew hangne ba mynhynnin ka sngi, na ka liang ka sorkar jylla ka la pynmih ia ki kyndon thymmai ban tehlakam ia ka ne ka jingpang Omicron ka ba la pynkhih win ia ka pyrthei baroh kawei.
Kumjuh ha Ri Bhoi District, na ka liang u Incharge Magistrate ka Ribhoi District Nongpoh, u la pynjari ia ki lad jingiada (Contaiment Measure) kat kum ka Regulation 3 jong ka Meghalaya Epidemic Disease, Covid 19 Regulation 2020 ha ka District baroh kawei haduh ban da pynbna pat da kumwei.
Ka jingpang kana kohnguh hukum te tang shu ong long kala long, one rule one world, u blei un leh la kajong ka kamram