Ym shuh tang da ka ktien, hynrei da ka kti ia kynrup u heh BJP bad u heh Congress

Man ka por, la ju iohi, ba ki nongialam jong ka seng BJP, ki ju ia byrthen iwei ia iwei, ha ki jingiakren ha ki prokram telebishon, ha ki jingialang paidbah; hynrei hynnin ka sngi, ki la ia ktah syndon marmet. Katei ka jingjia, ka dei haba U DK Sureh MP jong ka seng Congress, u ia ktah kti bad U CN Ashwath Narayan, myntri ka sorkar Karnataka, ha kaba u Basavaraj Bommai, myntri rangbah ka Jylla ruh, u don lang ha katei ka jaka, ha katei ka por.

Katei ka dei ka jingialang, ban plie ia u dur mot jong U BR Ambedkar bad U Kempegowda.

U Narayan, ha ka jingkren jongu, ula ther tyngeh ia ki liang pyrshah, khamtam ia ka seng Congress bad u da iaroh ia ka seng BJP, kaba dei ka seng, kaba ki paidbah ki ieid bad u ther tyngeh ruh ia ki nongtrei ka seng BJP, kiba thmu ban khanglad ia katei ka jingplie ia utei u dur mot.

Ha ka jingkren U DK Suresh, uba dei U MP jong ka seng Congress, ula ther kylla ia U Narayan bad ka dei ha katei ka por, ba ka la don ka jing iaknieh ia u microphone hapdeng U Narayan bad U Suresh. Donbok ba ki don ki pulit hajan, kiba la pyn iakhlad ia kitei ki arngut kiba la ia sdang ktah kti iwei ia iwei pat.

Katei ka jingjia, ka la pyn bitar ia ki nongialam Congress, ha kaba U Suresh bad kiwei de ki nongialam jong katei ka seng, ki ia shong kyrain ha madan, kum ka jing sngew pyrshah halor katei ka jingjia.