Mynta yn pynkhyllem lamphang ka PDF ia ka kong Teilinia

Shillong, 24 Jylliew:
Shibun ki kyntien jingiaroh ia ka Chairperson ka KHADC la khlei da ki MDC ka Liang Syn shar mynta ka sngi ha ka dorbar jied Deputy Chairman ka KHADC bad la ioh sngew ba ki la iaroh ka jingtbit ka kong Teilinia Thangkhiew ban pyniaid dorbar khlem kano kano ka jingshah liang hynrei ka la bat ia u lakam kum ka nongpyn iaid dorbar.
Hynrei kitei ki jing iaroh ka PDF ki kylla long tang na shyntur bad bein na tdong, ha kaba shen kin sa pynkhyllem noh ia ka shuki ba katei ka MDC ka shong da kaba wanrah ia ka No-Confidence Motion (NC). Katkum ki tyllong khubor na ki MDC ka PDF la iathuh ba ha ka jingshisha ka PDF ka la don ka jingthmu ban wanrah ia ka jing ia tynjuh bor mynta ka nohsngi, hynrei namar ba ki dang hap ban pyndep ia ka jingialang jong ki, la ong ba ia ka jing ia tynjuh bor, yn leit rah lashai mynstep ha ka por 10 baje, khnang ba yn ioh ia tynuuh bor hapoh ing dorbar.
Katkum ka khubor ba la ioh lum na ki MDC ka PDF ki la iathuh ba ha ka jingshisha ka PDF kam kwah ban pyni ba ka rhah bor ban wanrah da ka jing ia tynjuh bor , hynrei ka kwah bad ka iai ap ba ka kong Teilinia kan risain hi na katei ka shuki, hynrei hadien ba ka kong Teilinia ka la pynpaw ha ki kot khubor ba kan ym risain, ka PDF ka la shim noh da ka rai ban wanrah da ka jing tynjuh bor. La iathuh ruh ba ka PDF ka la don jingthmu kham mynshuwa ban wanrah ia ka jing bym shaniah ia katei ka lamphang, hynrei ka ap haduh ban da dep jied Deputy Chairman, bad hadien ba la dep jied mynta ka sngi la ong ba ka la pynkhreh ban leit rah da ka jing tynjuh bor, ban pyni ba kam don jingshaniah shuh ia ka Chairperson bad ka la kwah da uwei pat.
Lah ban pynkynmaw ba mar sien ioh ban bat ia ka bor synshar ha KHADC, ka PDF ka la dep pynbna ia ka kyrteng u bah Mansturdy Nongrem u CEM barim kum u Chairman ka KHADC bad la ong ba hadien ba katei ka kynhun ka lah ban pynkhyllem ia ka kong Teilinia kan jied da u bah Mansturdy ban shong ha katei ka shuki. Lah ruh ban pynkynmaw ba haduh mynta naduh ba sdang ka samoi treikam kaba thymmai ka KHADC ka la ioh haduh 3 ngut ki CEM, bah Ardent M Basaiawmoit, bah Adelbert Nongrum bad u bah Pynshngain N Syiem, hynrei wat la ka KHADC ka la ioh haduh 3 ngut ki CEM ka kong Teilinia ka la neh ha ka shuki Chairperson haduh kine ki sngi.