Ka jingleit phai jongnga, ha ki por ba la dep, ka dei na ka jingleh ki pulit, ong U Junel

Shillong: U Bah Junel Tongper u dkhot ka kynhun kieng atiar ka Hynniewtrep National Liberation Council (HNLC), u ba la wan ban pyndem wait ha khmat u Inderjit Singh Rane, IG BSF Meghalaya Frontier ha Border Outpost Umkiang, 97 Bn BSF, PS-Umkiang, East Jaintia Hills District, u iathuh ba ka jingwan phai jong u, ka dei namar ki kmie ki kpa ki la kwah ia u ban wan phai noh.

“Ngam lah ban iathuh ia ka daw ba nga la rai ban wan phai noh sha ka lynti ba dei hynrei na ka liang i kmie i kpa jong nga, ki la kwah ia nga ban wan phai noh ha kaba ki ju dwai Man ka por ba ngan poi suk sha ing” la ong u Bah Tongper.

U Bah Tongper u ba la wan pyndem wait mynta ka sngi u dei u Area Commander ha East Jaintia Hills, bad u dei ruh na ka Shnong Lumphyllut, East Jaintia Hills. u Bah Tongper u la pyniasoh ialade kum u dkhot ka HNLC ha u snem 2010 bad hadien ba u la pyntbit ia lade u lah trei kum u dkhot ba pura katei ka seng.
U Bah Tongper u la shah kem teng ruh ha ka ki pulit ha u snem 2015 bad u la lait jamin noh hynrei u la leit ban pyniasoh biang bad katei ka seng ha u snem 2020.
Haba ioh ban kylli halor ka jingleit phai biang jong u sha ka seng hadien ba u la shah kem ha u snem 2015 bad kane ka sien kan dei ka sien ba khadduh ba un ym leit phai biang sha ka seng, u la iathuh ba ka jingleit phai biang jong u kadei na ka jingleh ki pulit.
“Ngam lah ban pynthikna ia ki pulit ba ngan ym leit phai shuh namar ba ka jingleit phai biang jong nga, ha ki por ba la dep ka dei tang ka jingleh ki pulit” u la ong.

Na ka liang ki lad pathai khubor kim shym la iohlad bha ban kren bun por bad u bah Tongper, hynrei na ka liang ki shipai ki la iathuh ba ha u snem 2015 ki pulit ki la ioh kem ia u, hynrei u la leit phai biang, hynrei mynta ka kynti na ka liang ki BSF kin iarap ia u ban ailad ba un ioh ban im ka jingim ha ka lynti kaba dei.