Shongkun ka Tamasa Ri Kunai la Tynrai, ka NEFA ha Umden

Nongpoh: Ha ka sien balai ki nongkitkam ka Nongtluh Eri Farmers Association (NEFA), ki la lah ban pynlong biang ia kawei ka Tamasa kaba la tip kum ka Ri Kunai la Tynrai, ia kaba ki la sdang myn hynnin ka sngi bad kaba ki la pynkut noh hynnin ka sngi ha madan Umden Nongtluh.

Haba iadei bad katei ka Tamasa Ri Kunai la Tynrai, kitei ki nongkitkam ka NEFA, ki la ong ba ka nongrim kaba la pynlong ia ki ba kin pynlong ia katei ka Tamasa, ka long ban pynpaw pyrthei ia ka jingriew spah ka kolshor tynrai bad ka riti ka dustur u mynbarim ha katei ka thain, kata naduh ka riam ka beit, ka shad ka rwai, ka put ka tem bad khamtam eh ba katei ka thain, ka la paw eh haba iadei bad ka kam thainjain, kaba la ioh ruh ia ka jingithuh kum ka thain jong u Sai Ryndia.

Kiba la sakhi ha katei ka sngi, ki kynthup ia u Bah Mayralborn Syiem, MLA ka Nongpoh, ha ryngkat ka jingdon u Bah Balajied Ranee MDC, ki longsan mansan jong ka Raid Nongtluh, ki nongïalam ka NEFA ba kynthup ïaka Theresia Syiem President, kong B Malai Adviser, kong Mirajune Secretary, ki ophisar naka tnad Sericulture bad Handloom bad kiwei kiwei ki riew rangbah ryngkat ki longkmie longkpa lem bad shibun ki khun samla na katei ka thain.

Haba iadei bad katei ka Tamasa, u Bah Mayralborn Syiem, u la ai ka jingiaroh kaba khraw eh ia ki nongialam ka NEFA, namar ka jinglah jong ki ban iai pynlong ia kaba kum katei ka Tamasa, kaba long ruh kum shibynta ban kynsiew thiah ia ki samla ba kumno ba kin tip ia la ki jong ka riti dustur bad ki kolshor Tynrai.
Utei u nongmihkhmat ka Nongpoh, u la kyntu ia ki longkmie longkpa jong katei ka thain, ba ki dei ban long kiba iatylli na ka bynta ban pynneh ia ki riti dustur bad khamtam eh ban nangkyntiew shuh shuh haba iadei bad ka jingpynmih ia u Sai Ryndia bad ki Jain Ryndia, kaba katei ka thain ka la iohnam halor ka jingpynmih ia ki Jain Ryndia, kiba dei ki Jain kaba la shu thain da ki kti.
La pynphuh pynphieng ruh ia katei ka Tamasa da ki jingshad bapher bapher bad ki jingrwai Tynrai bala shim bynta da ki khun ki hajar jong ka Raid Nongtluh ryngkat ki jingpyninam lyngba ki dukan ia ki jait tiar bapher bapher kiba thain hi, ki jingbam tynrai, ki dukan ba pyni nam ia ki Jain Ryndia lem bad shibun kiwei.