Ka sorkar MDA, ka dei ne em ka nong kyrshan ka NDA, kylli ka kong Ampareen

Shillong:Ka nongialam ka Congress Legislative Party (CLP), ka kong Ampareen Lyngdoh, ka la ong ba ka Congress party ha ka jylla Meghalaya mynta ka kynti, hapoh ki nongialam ba thymmai kam dei shuh ka party ka ban long mraw lane ka ban shu shah hukum hangno re hangno bad ka rai ban ia trei lang bad ka sorkar MDA ban weng ia ka jingeh ki paidbah ka dei ka rai ka ba bha tam.

“Kane kan long ka jubab ka ba shai kaba ngan ai sha kito ki ba sngew ba ka Congress mynta, ka la long ka dkhot jong ka NDA, nga sngew ban ong ba kam dei ka kamram jong ka Congress ban pynshai ba kane ka sorkar MDA ka dei kaba dkhot jong ka NDA lane ka dei ka nongkyrshan ia ka NDA ka dei ka sorkar MDA hi ka ban pynshai ia kane” la ong ka Kong Ampareen, sha ki lad pathai khubor.

“Ngam tip ba kane ka sorkar MDA kaba kynthup ia ki party kum ka NPP ka UDP ka HSPDP ka PDF bad kiwei kiwei kin pdiang ia kane ka jingkynnoh ka AITC, ba ki dei ki nongkyrshan jong ka NDA, ki dei ban pynshai ia kane. Ha ka jing iohi jong nga ha ka sorkar MDA ki don tang arngut ki MLA na ka BJP” la bynrap ka kong Ampareen.
Ka kong Lyngdoh ka la bynrap shuh shuh “Haba ngi leit ban ia kren bad u myntri rangbah ka jylla u Cnrad K Sangma, kim shym la don lang kita ki MLA ka BJP bad ngim tip balei kane ka Sorkar MDA ka shah kynnoh ba ka dei ka sorkar NDA bad halor kane ka bynta ka dei ka sorkar MDA hi ka ban jubab la ka dei ka nongkyrshan jong ka sorkar NDA ne kam dei” .

Ka nongialam jong ka CLP ka la ong ruh “Ka jingkwah ban ia trei lang bad ka sorkar jylla ka long, tang namar ba ngim kwah ban sei ia ki mat kiba ktah jait bynriew tang ha ka por ba don ka jingpynlong ia ka jingia shong dorbar, kam don jingma eiei ia ka sorkar ba kan pynlong ia ka All party Meeting la kiwei ki party kin wan ne em, ngim sngew eiei hynrei na ka liang ka Congress ka long kaba kloi ban wan ban shim bynta ha ka ne ka jingialang”.

“Lada ka sorkar ka lah ban khmied lynti ba ki 60 ngut ki MLA kin iasoi lang ban kyrshan ia ka resolution jong ka ILP hapoh ka ingdorbar, haba ka sorkar ka donkam ia baroh ki 60 ki MLA na ka bynta ban pdiang ia ki resolution bapher bapher ym shem la don ban kdew ba ki dei ki sorkar MDA ngim kwah ban soi, hynrei baroh ki iasoi lang” ka la ong.
Ka la ong ruh ba ka jingkynnoh jong ka AITC ba ka congress ka la iajan bad ka BJP, ka dei tang ka jingbatai stad jong kito kiba kwah ban kren ia ki jingkren ba khlem nongrim, namar ba ki Congress hi ki khlem kynduh ia ki BJP, hynrei ki leit ban ia kynduh ia u Myntri rangbah, u ba long u nongialam ka NPP, u ba dei u nongialam kane ka sorkar MDA.