Niad syep U Modi, da ka lama India

Puducherry, 23 Jylliew:
U V Sundar uba shong ba sah ha Nellithope, u la ujor sha ki pulit ka Orleanpet Police Station pyrshah ia u myntri rangbah duh ka ri u Narendra Modi bad u la kynnoh ba u la pynkhlem rain ia ka ri India da kaba niad syep da la lama lai rong ka ri India. Ki pulit nyngkong kim shym la patiaw ia katei ka jingujor bad ki pan jingshai na u halor katei ka jingujor.
Kham hadien u Sundar uba dei ruh u general secretary ka Dalit Sena bad u nongpyniaid ia ka WhatsApp group Puducherry Poraligal Kuzhu, u la ong ba u la ioh ia ka jingthoh ha ka mobile jong u ba u Modi u niad syep da ka lama ka ri ha ka sngi rakhe Yoga kaba long ha nongbah Delhi. Ha ka por 3 baje noh sngi jong ka sngi hat majai u Sundar u la leit ban ujor sha ki pulit namar ba u sngew ba ka dei ka jingleh u Modi ka pynkhlem rain ia ka ri India bad u la ong ba ia ka jingujor u la ai ha u Inspector Viravallabane. Hynrei ha ka por 3:50 u OC katei ka thanad u la pan jingshai na u. Haba kren sha kawei ka lad khubor u Senior Superintendent of Police (Law and Order) katei ka District u V J Chandran, u la ong ba un tohkit ia katei ka kam bad un wad ia ka jingshisha katkum ka jingujor ba la ioh.