“Yn sad kumno u shynrang, haba la pyneh, kum u treng kulai”

Shillong:”Mynshwa ngim iohi ia ka pyrthei, ngi im ha ki thain nongkyndong kumto, hynrei mynta ba la iohi ia ka pyrthei, ka la kylla nadong hadong, ha ka kren ha ka khana, ha ka riam ha ka beit” ong U Pastor MJ Skhemlon, haba iakren bad U Rupang, ha ki khyndiat sngi ba ladep, haba kynthoh halor ka jinglong jingim jong ki briew ha kane ka juk mynta.

“Baroh kiba ngi pule mynshwa, haduh BA, ngi ia pule, ia ka jingsneng tymmen. Hangno kito mynta, dang long phin hikai ia ki, ia ka riam ka beit, ka kup ka sem, ka sad ka khyllong, ym don shuh” ula ong biang. “Yn sad kumno u shynrang, haba la pyneh kum u treng kulai. Phim iohi ia kata? Te ki kynthei kin khyllong kumno, lah …. ym long shuh mynta ka kup ka sem, ka riam ka beit, ym long shuh, ki la ia bud?

“Ka pyrthei hi borabor ka ktah bha, ka kloi ba kin ia bud. Hikai ia kaba bha, oh lano kan shitom, hynrei phin iohi ia kiei kiei pat, mynta mynta kin ia bud, iohi mynta, lashai la ia bud. Ka juk ka long kumta, phi iohi, ka Science Technology, ka la palat phi” ong U Pastor Jones Skhemlon.