JAH KYRTENG U JISU, HA KA AIOM KHRISTMAS

Bah Shiningstar Warjri,
Umran-Dairy, Ri-Bhoi District.

Ha kane ka aiom Khristmas, kaba dei ka aiom kaba baroh ngi bunkam bad bun jingmut jingpyrkhat bha. Hapdeng kine kiei kiei baroh, to ngin ia phai khmat sha ki riew paidbah kumno ki pyrkhat, ki iohi bad ki sngew halor kane ka aiom Khrismas?. Kine ki long ki jubab harum, kaba nga ioh lum na ki karta bapher bapher:-

1. Nongkylli: Khublei Hep, kaei ka por Khristmas na ka bynta jong phi?
   Khynnah 5 snem: Ka Khristmas kadei ka por ba ngi wah khlur ha iing, buh disco light bad u diengkseh ha baranda iing, ngi tem jingrwai Khrismas bad imei i shet jingbam ba bang ia ngi.
2. Nongkylli: Khublei Heprit, kaei ka por Khristmas na ka bynta jong phi?
   Khynnah 10 snem: Ka Khristmas kadei ka por ba ngi iaid karol, lehkai sport bad bun kiwei de ki jingpynialehkai da ki samla ha iingmane, ngi leit bam khana, shad bad pynbthei bom.
3. Nongkylli: Khublei Hephep, kaei ka por Khristmas na ka bynta jong phi?
   Khynnah 15 snem: Ka Khristmas kadei ka por ba ngi la kut exam skul, ngi ia iaid karol, phong jain syiad bad ba itynnad bad ngi ia shad jingrwai ba sngewtynnad baroh shimiet.
4. Nongkylli: Khublei paralok samla, kaei ka por Khristmas na ka bynta jong phi?
   Samla 18-20 snem: (Rkhie rymmuin) Ka Khristmas kadei ka por ba la kut ki aiom leit skul, kadei ka por ba ngi lehkmen leh sngewbha bad ka por ba ngi ia pynbeit bam khana bad ki paralok sha khlaw. (Bynrap ktien na kyndong) Kadei ruh ka por ba ngi ia wad chick thymmai. (Ia rkhie pashaid artad)
5. Nongkylli: Khublei Kong kong, kaei ka por Khristmas na ka bynta jong phi?
   Samla kynthei 18-20 snem: (Ki rkhie rymmuin) Ka Khristmas kadei ka por ba kmen tam ha ka jingim jong ngi, kadei ka por ba ngi leit shopping sha Shillong/PB ban thied bad jied ia ki riam ki beit kiba thymmai thymmai bad ki basyaid.
6. Nongkylli: Khublei Kong, kaei ka por Khristmas na ka bynta jong phi?
   Longkmie: Ka por Khristmas kadei ka por ba kulmar jingmut tam ia ngi ki kmie ki kpa, ka por ba shah dawa har rukom ha ki khun, khamtam ruh kadei ka por ba rem tam ki mar ki mata baroh, sa bym biang ka kamai kajih kumne te,, sngew kum ban king ka janor phi.!
7. Nongkylli: Khublei Meiieid, kaei ka por Khristmas na ka bynta jong phi?
   Meiiied: (Kyrngah khlieh) Nii,, nga iohi ba kane ka aiom Khristmas te, kadei ka por ba ki samla ki leh shongshit bha, la ha ka riam ka beit, ka leit ka wan, ka dih ka bam,, ima phi, ban kham jrong kane ka aiom te,, iohi kumba kin ia iap kloi lut phi.!!
   Kane ka jingkylli pyrthew kadei kaba shu pynwandur da u nongthoh, kat kum ka jingiohi bad ka jinglong jingman ba shisha ha ka Imlang ka sahlang ka jong ngi. Lada dei ba kylli pyrthew ia ki Pastor bad ki Phadar lehse, kin kham jubab riewblei namar jait ba kidei kita ki nongsharai balang, hynrei te, kin iohi ia kine hi ki juh ki jingiohi. Na ka liang jong nga, ngam sngewdonkam ban da pynshai ne pyni halor kane ka jingthoh, phi la sngewthuh khambha ma phi ban ia nga, kaei ka jingthmu bad kaei ka pharshi jong kane ka jingthoh.?
   Shwa ban pynkut, ka kylli pyrthew sa sha ia uwei pat u nongshong shnong ba kham kongsan ha ka Imlang ka sahlang ka jong ngi.
8. Nongkylli: Khublei Bah, kaei ka por Khristmas na ka bynta jong phi?
   Bah buaid: Nii,,,, (Khih met artad) ka por Khristmas te kadei ka por khriat phi,, leh kulmar te,, ym long shuh,,, hap poi iing noh kham kloi, kham kloi,, ym long shuh phi ban ia thiah kai lynti syngkien,, kham leh biej te,, poi sha ka iap ei..!!!.

Khublei Khristmas ia phi, khunlung, Khynnah, Samla, Longkmie Longkpa, Meiiied Paieid bad baroh kiba trei shitom ban pyndap ia la ki jong ki jong ki jingdawa ha la ki rukom bapher bapher. U Blei Un dang kyrkhu ia phi baroh.