Ka sotti juk jong ka thain Riwar

Ka jingtip, kaba la sam da U Pastor MJ Skhemlon sha ki nong pule jong U Rupang, ka la long ka khubor, kaba sngewhun hi jrut ban tip bad kata ka long, halor ka sotti juk jong ka thain Riwar, ia kaba la ju tip, ba ka dei ka ri u soh u pai lane ka ri jong ka dud ka ngap.

Ha ki kyntien jong U Pastor, uba don 92 snem ka rta, u iathuh ba ha ki snem shwa ka jing laitluid ka Ri India, lane ha ki snem ‘40, ka thain Riwar Mawdon, ka dei kaba da riew spah shisha da u sohniamtra, u kwai u tympew bad kata ka la long ka spah bah ia katei ka thain, hi baroh kawei bad kam dei tang kata, ka pyni ruh, ba ha katei ka por, ka jing iadei jong ki briew na Riwar bad ki dkhar na Shilot, ka long kaba jan shibun eh, ha kaba ki ia die ia thied, ia kiew ia hiar, ia shalan khaw, ia shalan ia ka bam ka dih hapdeng kitei ki thain khappud.

Na kitei ki jing shisha, ka pyni ba ha katei ka sotti juk, nalor ba ki briew ki dei kiba im ha ka rep ka riang, kiba trei shitom, ia la ka jong ka kam; hynrei ha kajuh ka por, ba ki don ia ka jabieng kaba nep bad kaba skhem, ba ki poi ban ia shalan mar bad ki dkhar na Shilot, katba mangi pat mynta, ha kine ki sngi, ba ka jingstad, ka la kiew palat liam, hynrei; ia ki mar lajong, lada dei u synsar, u soh, ka sla tyrpad, ka jing shalan kaba sha jngai duh, ka dei tang ha ki khar kaia ha Shillong bad katei kam iahap satia, tang shi damli, na ka buit kamai jong ki mei ieid, ki paieid tymmen jongngi.

Lyngba ka jing iathuh utei u riew tymmen, uba la iohi dalade ia ka jingkhie spah jong ki War, na ka rep soh bad ka jing ia khaii bad ka Bangladesh, ka la dei ka por, ia u paidlang ka thain Riwar, ba un kyndit bynriew bad khyllie noh sa shisien, ia la ka jong ka buit ka stad ban plie biang ia ka kamai kajih bad ka khaii pateng bad ka Bangladesh, kaba shu donkam lut naphang, ia man ka jingmih na ka Riwar.

Lah ban ong, ba ha ki snem 47, ha ka por jong ka jinglaitluid ka Pakistan, ba ka India, ka la kylla nongshun, hynrei mynta, haba ka East Pakistan, ka la dap 50 snem, ha ka kyrteng jong ka Bangladesh bad haba ka India, ka don ka jing iadei kaba jan bha bad katei ka Ri, kumta ka la dei namarkata ba ka kamai kajih, ka ioh ka kot, ka leit ka wan hapdeng ki ar tylli ki Ri, kiba ia shong ia sah mar khappud, kan plie noh sa shisien, ban ailad ia ka ioh ka kot jong ki Riwar, kiba la shah khanglad naphang ha kine ki sngi.