Halor ka ILP, CAA, iawer ki MLA Congress ban iatreilang bad ka sorkar MDA

Shillong: Ki san ngut ki MLA jong ka party Congress, myn hynnin ka sngi ki la leit ban ia kynduh ia u myntri rangbah ka jylla u Conrad K Sangma ban tyrwa ka kti ka diang kti kamon ban iatreilang na ka bynta ban weng ia ki jingeh jong ki nongshong shnong ha ka jylla.

“Kum ki liang pyrshah kiba don ha poh ka ing dorbar thawain jong ka jylla ngi wan ban kynduh ia u Myntrirangbah ka jylla, kum shi bynta ban pyndonkam ia ka jingiadon lang jong ngi hapoh ka ingdorbar ha ka rukom ba bit ba biang ban ailad lang ban weng ia ki jingeh ki paidbah”la ong ka nongialam ki liangpyrshah ka kong Ampareen Lyngdoh.

“Ngi kloi ban iakren lang bad ka sorkar ban iasyllok halor ban weng ia ki jingeh jong ki paidbah, la ka dei ia ki Skim, ka mat ILP, CAA, ban kynthup ia ka ktien khasi Garo hapoh ka 8th Schedule bad kiwei kiwei” ka la bynrap.
Ka kong Lyngdoh ka la ong ba ha kaba iadei bad ka skim Chief Minister Special Assistant, kum ka jingiarap ia ki longkmie ba shah ieh lok, ka baibam tymmen, ka jingiarap ia ki ba duna ka bor met,ka skim shna ing ia kiba duk ka sorkar ka dang donkam ban bishar bniah ia kane, namar bun na ki paidbah kim pat sngewthuh ia kine.

“Ngi la iakren ruh halor ka jingdonkam ban pynbha biang ia ki ing kiba duk ki ba don ha Nongmynsong, ki ba mynta ki la donkam biang ka jingpynbha”.
Kala ong ruh ba lada ka party Congress ka wan shakhmat ban wan tyrwa ban iatrei lang bad ka sorkar MDA na ka bynta ka jingbha jong u paidbah kam dei ban mih kano kano ka jingsngewpher lane ka jingsuba sniew.
“Ka jingwan shakhmat jongngi ka long ban iatrei lang ban weng ia ki jingeh jong ki nongshong ha ka jylla, khnang ban tei, khamtam halor ki mat ILP, ka CAA, ka jingkynthup ia ka ktien khasi bad Garo ha ka 8th schedule” ka la ong.

Ka la bynrap ruh “Lada ka sorkar ba ialam da u Conrad K Sangma ka ibit ia kane ka jingtyrwa ban iarap ban iatrei lang jong ka party Congress, lyngba ka jingkynthup lang ia ki MLA ka Congress ha ki Committee bapher bapher ban peit ia ka jingtehsong ia kine ki kam, nga tharai ka jingbha suda kan wan ia ki nong shongshnong ha ka Jylla”.
Ka Kong Ampareen ka la pynshai ruh ba kane ka jingwan jong ki mynta ka sngi kan ym dei ka jingkyrshan ia ka Sorkar MDA, hynrei ka dei tang ka jingkyrshan ban iakhun ia ki jiingeh jong ki nongshong shnong ha ka jylla.