Shillong:U Myntri Rangbah u Conrad Sangma, ha ka sngi Thohdieng u la sam ïa ki cheque sha ki co-operative society jong ka Khasi bad Jaiñtia Hills bapher bapher ha ka prokram ba la long ha State Convention Centre, Shillong ha ka jingdonlang u Myntri ka tnat AH & Veterinary, Bah Sanbor Shullai, Principal Secretary, AH & Veterinary, GHP Raju and Commissioner & Secretary, Dr Vijay Kumar.
Haba kren ha ka jingïalang, u Myntri Rangbah u la ong ba ka don ka jingpynkynriah kaba heh ha baroh ki jingpynlut jong ka Sorkar ha kiba bun ki bynta ba hakhmat kiba kynthup ïa ki jingpynpoi kam,ki jingpyntreikam, ki jingkyntiew ki kam ka sorkar bad kiwei.
U la ong ruh ba ki nongshong shnong ka jylla ki bam dohsniang kumba 18,000 MT ha ka shi snem ha kaba na ka, kumba 10,000 MT la wanrah nabar bad lada lah ban pynmih na ka jylla lajong ka jingïoh kan neh hapoh ka jylla.
“Ngi don ki ïew ba la khreh lypa bad ngi shu donkam tang ban shim kabu ïa kane ka ïew da kaba ai jingkyrshan bad ki jingtei bad ban thaw ki lad ai jingim na ka bynta ki briew ba kin lah ban ai ki jingïoh nong biang sha ki nongshong shnong ka jylla” u la ong.
U la pynthikna ruh ban ai jingkyrshan sha ki 12 tylli ki jaka ri sumar ïa ki sniang (Pig Breeding Centers) ha ka jylla.
Lah ban kdew ba ïa ka Milk Mission la bei tyngka da ka National Co-operative Development Society da ka jingmang pisa T. 215.48 klur kaba la pynlong ba kan long Milk Mission kaba heh ha thaiñ shateilammihngi ka ban long ka jingmyntoi beit beit ïa ki 2000 hajar tylli ki longïing bad ki shithi shim ram ba la mang ka long baroh T. 12.20 klur ba la sam sha ki 40 tylli ki co-operative society jong ka jylla.
Hapoh ka Piggery Mission ka ram ba la mang sha ki 100 tylli ki co-operative society ka la long ha ka dor T. 18.53 klur kaba lah ai.
Phi don ban ong eiei?