Sngewkhia ka sorkar India, ba sdang pur stet sa ka khlam Omicron

New Delhi: Ka khlam covid 19, kaba la tip, sa ka kyrteng thymmai, Omicron, ka la nang pur stet ha India ha kine ki sngi, ha kaba ki don 101 ngut kiba ioh ia katei ka jingpang haduh mynta, ong ka tnat ka koit ka khiah ka sorkar India, mynta ka sngi.

Ki don 19 tylli ki district ha ka Ri, kiba don ha ka jing shah ktah jur, ha katei ka jingpang bad ka tnat ka koit ka khiah, ka pynsngew ia ki paidbah, ba kin long kiba husiar bha, namar ba katei ka jingpang, ka la nang kiew stet ha kiwei ki ri ka pyrthei. La ai jingmut, ban nym leit jingleit, lada ym donkam eh satia, ban nym ia lum ia bun briew bad ban leh tamasa kaba mata madei.

Katei ka tnat sorkar, ka ai jingmut ia ki paidbah, ba kin nym leh sting ialade, ha ka jing iada, ba kin ia shong jngai iwei ia iei pat bad ban nym ia lum ia bun ruh.

Ka Maharashtra, haduh mynta, ka don 32 ngut kiba ioh ia katei ka jingpang omicron, ka Delhi 10 ngut, nangta ka Tamil Nadu, Andhra Pradesh, Karnataka, Gujarat, Kerala bad ka West Bengal, ki la don ia katei ka jingpang, ha kine ki sngi.
U Lav Agrawal, Joint Secretary ka tnat ka koit ka khiah, u iathuh ba katei ka jingpang, ka la pur sha ki 91 tylli ki Ri ka pyrthei. Ka WHO, ka kam ba ka jingpang Omicron, ka kham pur stet shibun ban ia ka Delta ha South Africa.
La iathuh ba ka India, ka ai dawai iada covid kaba tam 4.8 shah, ban ia kaba long ha United States bad 12.5 shah, ia kaba long ha UK.