Yn buh khambun ki jaka khmih kali ban ïada takhuh kali, ong U Conrad

Shillong:U Myntri Rangbah ka jylla, u Conrad K Sangma hadien ba u la plie ïa u mawnongrim na ka bynta ka Inspection & Certification Centre ha Sawlad, Shillong, ha ka jingïadonlang u Myntri ka tnat Transport, u Bah Dasakhiat Lamare, ka Chief Secretary, Kong Rebecca Suchiang bad u Commissioner & Secretary, Transport, M R Synrem, u la ong ba ka sorkar kan sa nang ïai plie shuh shuh ïa kitei ki centre hapoh ka jylla.

“Ka jylla kan sa sakhi ïa ka jingïai bun ki kali ha ki snem ban wan bad ban don ïa ki Inspection and Certification Centre ha Shillong ka long kaba donkam bad kine automated inspection bad certification center kin pynduna ïa ka por khmih bniah jong ki kali. Ka long kaba donkam ban rai ïa ki kali kumno ban ïaid ha ki surok khnang ban ïada na ka takhuh kali na ka daw ki jingthut kumjuh ruh kan pynduna ka jingpynmih tdem jaboh (carbon dioxide emission) na ki kali. Ka sorkar kan dang treishitom ban ïoh plie khambun tylli ki testing center ha kylleng ka jylla. Nga ai khublei ïa ka sorkar Pdeng, lyngba ka Ministry of Road & Highways halor ka jingïarap pisa ïa ki center. Nga kyntu ruh ïa ka tnat Transport ban pyndep kloi ïa projek,” u la ong.

Kham ha shwa u Commissioner & Secretary, Transport, M R Synrem u la ïathuh ba baroh kawei ka projek la bei tyngka da ka Ministry of Road & Highways, Government of India, kaba la khmih lynti ban pyndep hapoh ki 10 bnai.