Sdang pyrshah, ba khanglad ia ki nong hikai ban trei politiks

La iohi, ba ki la nang mih, kiba pyrshah, halor ka rai jong ka sorkar jylla, na ka bynta ban khang ia ki nonghikai ba kin trei kam politics bad kawei na ki seng sain pyrthei ka Voice of People’s Party (VPP), kaba don shibun ki nonghikai, ha ka, ka la ai da ka dorkhas sha U Conrad Sangma, myntri rangbah ka jylla, halor katei ka mat.

Katei ka rai khlem pep, ka long kaba donkam, namar ba ngim lah ban khmih lynti, ba ki nonghikai, kin don ha ki rynsan politics, ha ka jaka, ba kin don ha ki kamra klass bad ka jingthmu, kaba don ha ka sorkar jylla, ka long beit ba u nonghikai, um lah ban ia kyrsum ialade ha ka politics bad ngi iohi ia kata ba ka Balang Presbyterian, kaba dei kawei na ki balang ba paw ha Ri Khasi Jaintia, ba kam shah, ia ki pastor jongka, ba kin iakhun elekshon, katba ki dang don ha ka kam.

Wat la katta, ka sorkar jylla, ka la dei ban shu kham pyn jynsur khyndiat bad kata ka long, halor ka kam shnong kam thaw lane ka kam balang, namar ba kane ka phalang ia ka ain, kaba la thaw da U Mukul Sangma, kham mynshwa ha u snem 2016 bad kaba la pynkhih tik ia ki Rangbah Shnong bad ka daw ka long ba ki kam shnong kam thaw, ki dei ki kam ki bym don jingmih eiei, hynrei kiba donkam ia ka thoh ka tar, ka khein ka diah bad ka shong dorbar dorshar, ha kaba ha kane ka juk, ngi donkam ia ki riew tip ain bad kiba la tip ia ka thoh ka tar, ba kin pyniaid beit ia ki dorbar shnong.

Ka sorkar jylla, ka dei ruh ban tip, ba ki dang don bun bah ki nong shong shnong ha Ri Khasi Jaintia, ki bym pat lah ban pule ne thoh dak bha bad kumta, ki nonghikai, ki dei ki nongiarap, kiba hajan bha jongki, ha ki rai jong ki dorbar ne ki komiti shnong.

Ka la dei ia ki seng bapher, lada dei ki seng sain pyrthei, lane ki dorbar shnong, lane ki seng bhalang, ba kin nym ia khih pyrshah ia katei ka ain, namar ba katei kan ailad ia ki nonghikai, ba kin duriap ia la ka jong ka kam; hynrei lada kam don kano kano ka jingteh kyndon, kumta kan sa poi ka por, ba baroh ki nonghikai skul, ki nonghikai kolej bad ki nong hikai jong ki University, kin don la ki jong ki jong ki parti bad katei kan sa synshar da ka bor jong ka politiks, ha ki jaka hikai bapher.