“ABBA”

Dr. B.R. Marpna

Ka dei ka kyntien kaba pyndonkam paidbah bha ha kine ki 2 (ar) tylli ki jait ktien, ka Aramaic bad Hebrew bad ka jingmut jong ka, ka mut ‘Kpa’ ne Father. Ka dei ka jingkhot kaba sngewtynnad bad sngewieid ban khot ia kane ka kyntien la ka long ha ki longiing longsem ne ha ki jaitbynriew kiba pher bapher haba ki khot ia kane ka kyntien. Haba ki khun ki khot ‘PA’, katno ka long kaba pynjan, wanrah jingiadei bad jingsngewieid haduh katta katta.

Ki jaitbynriew Jiw kim ju kham kren ia kane ka kyntien haba ngi peit na ka Testatament kaba Rim hynrei U Jisu haba U duwai u ju pyndonkam bha ia kane ka kyntien ban duwai ha U Blei bad ban ong ‘Ko Kpa’ ne ‘ABBA’. Ia kane ngi lah ban shem ha ka Gospel katkum u Markos 14:36 ‘U la ong ruh, Abba, Ko Kpa, kiei kiei baroh ki long kiba lah ha me; to pynphai noh ia kane ka khuri jong nga; pynban ym ia kaba nga mon, hynrei ia kaba me mon”. Ki Khristan kiba nyngkong ruh ki ju pyndonkam bha ia kane ban khot Abba ia u Kpa namar ba la tingkhun da U Jisu Khrist. U Apostol Paul ha ka shithi sha ki Nong Rom u thoh kumne ‘Namar phim shym la pdiang ia ka mynsiem ka jinglong mraw pat ia ka ban sheptieng; hynrei phi la pdiang ia U Mynsiem ka jingtingkhun, da uba ngi iaiam kyrpad, Abba! ko Pa!’

Haba ngi iakren ia kane ka kyntien, ka kit jingmut shikatdei eh bad ka ai jinghikai ia ngi lada ngi pynshongnongrim ia kane ka jingkren namar ba ka pynlong ban wan hajan ia U Blei bad ban iathuh lut ia kiei kiei kiba ngi angnud ha ka jingim jong ngi. Kumba ki khun ki kti ki khot ban ia phylliew mynsiem ryngkat bad la u jong u kpa, katno tam ia ngi haba ngi don ki jingeh, jingkhuslai, jingjynjar, jingdonkam ba ngin iathuh lut ha U Kpa da ka jingiasyllok ba marwei bad U ha ki jingduwai kiba rieh ban ong ‘ABBA’, Ko Kpa.

U Blei Un Kyrkhu, Amen.