680 synduk ka kyiad phareng, kurup ki Pulit Jerobad na kawei ka trok

Nongpoh: Ha ka 8 tarik mynta u Bnai, ki Pulit ka Jorobad ki la ioh ban bat ia kawei ka trok kaba kit kyiad beain, kaba wan na Khetri da ka jingthmu ban leit pynpoi ia katei ka Kyiad phareng sha Guwahati, ha kaba ki la ioh ban kurup ruh haduh 680 song ka kyiad Officer choice.

Katei ka Trok kaba kit ia katei ka Kyiad beain, ka dei kaba don ia u Number AS 01 EC 8525 bad na katei ka trok la kurup ruh ia ka Challn kaba la thoh kyrteng M/S Shiva Beverages Pvt. Ltd Company na Khetri Kendubam thain Sunapur bad katkum katei ka challan katei ka Company ka dei kaba lah ba shna tang ka Country Liquor Brand ba la ai kyrteng ka Bindass country Spirit.

Nalorkata, la lap ruh ha katei ka song kyiad la ai kyrteng 9mile, Blended and bottled da ka North East Bottling, 9mile Badidua, Meghalaya ba la ai pat ïa u pincode ka Assam, 781023.
Haba iadei bad katei ka jingioh kurup, ki pulit ka Jorobad ki la dang pynlong ia ka jingtohkit bad ha kajuh ka por ruh ki la register case pyrshah ïa katei ka trok katkum ka kyndon 379/420/468/471 ka Indian Penal Code (IPC).