Khang ka sorkar jylla, ia ki nonghikai ban shim bynta ha ki kam sain hima sima

Shillong: Ka sorkar jylla, ha ki khyndiat sngi ba ladep, ka la thoh sha ka North Eastern Hills University (NEHU), sha ki Deputy Commissioner lem bad shibun kiwei ki tnat sorkar, ha kaba ka la pyntip ia ka hukum, kaba la pynmih da ka sorkar jylla, ha ka 23tarik Lber 2021, kaba khang ia ki nonghikai jong ki skul kiba ioh jing iarap na ka sorkar (aided educational institution) lem bad ki nonghikai ha ki kolej, ki University, kum ki Lecturer, ki Proffessor, ki Asstt Proffessor bad kiwei, ba kin shim bynta ha ki kam sain hima sima, ki kam shnong kam thaw (local bodies) lane ba kin shim bynta ha kino kino ki kam elekshon.

Katei ka dei ka hukum, kaba la pynmih da ka Deputy Secretary jong ka Education Department, kaba la soi ha ka 8tarik Naiwieng, 2021, lyngba ka shithi kaba Memo. No.Edn.49/2015/Pt.1/505-A.