Buh mawnongrim u Myntri sorkar ban tei ia ka Bhoirymbong C&RD Block

Nongpoh: Ha ka sngi kaba u Myntri ka tnad Community & Rural Development (C&RD), u Bah Hamletson Dohling, u la leit ban shim bynta ha kaba rakhe ia ka SHG Mela Cum Health Camp, kaba la long mynta ka sngi ha madan Kurkalang, Ri Bhoi, utei u Myntri sorkar u la lah ruh ban buh ia u Mawnongrim na bynta ban tei ia ka ophis treikam ba pura ka Bhoirymbong C&RD Block.

Na bynta ban tei ia katei ka ophis treikam ka Bhoirymbong C&RD Block, u Bah Hamletson Dohling, u la ong ba ka sorkar pdeng lyngba ka tnat Tribal Affairs, ka la pynmang pisa haduh T. 2.50 klur, ha kaba kan sa treikam noh shen, namar ia ka Work order, la dep ban aiti sha u Kontraktor u ban sa pyntrei ia katei ka ophis treikam ka Bhoirymbong C&RD Block.

Nalorkata, ha katei hi kajuh ka sngi, u Bah Hamletson Dohling, u la pynbna paidbah ba ka Traditional Market, kaba la sahteng mynta la katto katne bnai, hynrei mynta ka jingpynkhreh na ka bynta ban tei ia katei ka Traditional Market kan sa sdang noh shen, namar ia ka Work order la dep ban aiti sha u Kontraktor, ia kaba shen kan sa pyntrei noh.

Kiba la sakhi ha katei ka sngi kaba la pynlong ia katei ka SHG Mela Cum Health Camp, ki kynthup ia u Dasakhiatbha Lamare Myntri ka tnad Transport, Bah George B Lyngdoh MLA ka Umroi, Bah Rangkynsai Kharbuki MDC, SC Sidhu Director ka tnad C&RD, ka kong RM Kurbah Deputy Commissioner, Dr CJK Warjri BDO ka Bhoirymbong C&RD Block bad kiwei kiwei ki ophisar bad ki riewbah jong katei ka thain hi baroh kawei.