Ka sorkar ka leh aiu, ia ki nongrep

Khyndiat sngi mynshwa, la rakhe ia ka sngi jong ki nongrep ha ka jylla bad ngim tip, ka don kaei ka jing kyrpang, ha kaba iadei bad katei ka jing rakhe, namar ba la iohi, kumba la leh burom tang ia kita kiba la ioh buskit na ka sorkar India bad haba ka long kumta, la ka dang don jingmut ne em ia ka jylla, ba kan dang leh burom ia ki briew kiba la ioh ia ka khusnam kaba heh duh jong ka sorkar India, ka Padma Shri bad ka daw ka long, ba haba ka sorkar India, ka la ithuh, kumta baroh ki jylla lei, ki la hap ban ithuh salonsar.

Kam dei tang kata, hynrei kitei ki arngut ki nongrep, la ka dei ka kong Trinity Saioo lane U Nanadro Marak, ki la kiew sha katei ka kyrdan jong ka jing ithuh ka sorkar India, lyngba ka jingtrei shitom jongki hi bad kam dei satia, na kano kano ka jing iarap nawei pat.

Ki nongrep ha Meghalaya, ki don kawei ka mat kaba khraw than bad kata kam dei, ha kaba wad khusnam, hynrei, ka dei ha kaba wad ia ka dor kaba biang ia ki mar rep ki jongki bad dang khyndiat taiew mynshwa, ngi iohi, ba katno ka la mih ka jing lynniar jong kiba bun, haba u kubi u shongdor tang san tyngka shi kilo bad sa u muli, uba la shu bret kai sha lum, namar ba ym don ba thied shuh ha iew.

Kam dei tang katta, haba ka sorkar jylla, ka rakhe ia ka snem jong ki nongrep, kam dei ruh ban ithuh tang ia u nongrep phan, lane u nongrep sohtrun, hynrei, ka la dei ban ithuh ia ki nongrep synsar, ki nongrep sohniamtra, ki nongrep muli bad baroh jait ki jingrep bad ha kaba kum katei ka sngi, ka dei ban iakren ia ki jingeh ba ki iakynduh bad kam dei satia, ban shu ithuh, tang ia kaei kaba ki leh.

Ka jing kyrshan ia ki dor ki mur, ka dei ban long ka mat kaba ha khmat duh, lada ka sorkar jylla, ka pyrkhat ia ki nongrep, hynrei lada katei ka jingmut kam don, kam myntoi satia ban ialeh nongrep shisien shisnem, lane ban pynshlur ia ki nongrep, ban thung ia ki spah jait ki symbai rep, haba ynda la die pat, tang ka bai thung ruh kam mih satia.
Ki nongrep ka India, ki la lah ban pyn jem toin ia ka sorkar India, halor ka ain nongrep, hynrei kim pat hun bad ki kwah sa ka dor kyrshan jong ka sorkar (msp) bad ngi khmih lynti, lada ka sorkar jylla, ka sdang ia katei ka bynta.