Shongdum ka Mawphu & Dawki

Shillong, 21 Jylliew:
La shibnai tam myn ta ka shnong Mawphu, kaba don ha ki thain Sohra, kaba hap hapoh ka Shella Konstitwensi ka la shong dum namar ka jing bym ioh bording. Kham mynshuwa kumba katto katne taiew ka la don ka jinglip ding mar shiteng shnong bad mar shiteng pat ki ioh ding, hynrei kumba ar taiew mynta baroh kawei ka shnong ka la dum syndon tliw.
Haba ia kren bad u nongthohkhubor, uwei na ki samla ba ka shnong Mawphu ka la pynkupbor ha u ban ia kren u la ong ba la katto katne taiew ki bor shnong ki la leit ia kynduh ia ki bor ba dei peit ia ka bording ha katei ka thain bad ha katei ka jingiakynduh u la ong ba ki la iathuh ba ka daw ka jingduh bording ka dei namar ka jingsniew ki tiar ki tar bad ki la kular ba tang shu kham rang ka bneng kin wan ban pynshna noh, hynrei haduh mynta ruh ym pat don ba wan shna.
Katba ha kawei pat ka khubor, ha Dawki la iathuh ba ym don bording naduh ka sngi saitjain haduh ba thoh ia kane ka khubor, kaba la long la ar sngi kynthih. Ki tyllong khubor ki la iathuh ba ha Dawki tang u Lineman uba dei peit ia ka bit ka biang ka bording ha katei ka thain ruh um don mynta la ar bnai kynthih.
Lah ban kdew, ba katei ka jingduh bording ka la jia khah khah ha kine ki sngi ha kylleng ki jaka khamtam ha ki thain nongkyndong, ha kaba don ki shnong kiba da ki bnai ki bnai kim ioh bording.