U maw ruh u sakhi, ba ka dei hi ka hima Shyllong, ong U Basan Nongkseh

Shillong:Ki trai jaka, ki dei ban don bynta lang, ha ka kam pynbeit pud hapdeng ka Meghalaya bad ka Assam, ong U Bah Nathan Thangkhiew, Basan Nongkseh, ha ka jing iakren bad U Rupang.

U Basan Nong kseh, u ong ba kane ka jing pynbeit pud, kam dei ban long tang na suin, hynrei, ka don kam ban ngam jylliew bad ban sngewthuh shai ia ki jing shisha.

“Lada peit tang na sla, phin iohi, ba ka jingkam jongki, ka dei kaba hok, hynrei, ynda la ngam jylliew, phin hap tip ia ka histori” ong U Bah Thangkhiew bad ula ong shuh shuh, ba lada peit tang na sla, kum sngew iahap, ia kata ka mat give and take policy, hynrei lada la tip ia ka tynrai, kumno kan mih kata ka mat jong ka give and take, ula ong shuh shuh.
U Basan, u pyn kynmaw ruh ia ka jingmynjur jong ka Parliament ia ka North Eastern Reorganisation Act bad ha katei ka ain, ka Dima Hasao, ka North Cachar hills, Karbi Anglong, ki dei ki bynta jong ka Hima Jaintia bad ki la dei ban don bad ka Meghalaya bad ka Parliament, ka la thaw da ka ain bad kitei ki dei kum ka Block I, Block II jong ka Hima Khyrim bad kiwei kiba dei ha Jaintia hills.

La kren bynniaw da U Basan, ba ka don ka jing iabam ia dih ha katei ka por, ha kaba ia ka ain kaba la thaw ha U Kyllalyngkot jong u snem 1970, la pyn kylla noh ha u Iaiong 1970, namar ba ka Karbi Anglong, Dima Hasao, kam treh shuh ban wan sha Meghalaya.

U Basan Nongkseh, u iathuh ruh ba ka don ka jaka, kaba kyrteng ka Nakoshi, Khetri, u don u maw sahnam jong ka Hima Shyllong bad ia utei u maw sahnam, na ka liang jong ka Hima Mylliem, ka la iakren bad ki trai raid hangtei, ha kaba ki la shna pynbha bad ula ong “Kato hi ka sakhi, ba u maw ruh u sakhi, ba ka dei shisha ka hima Shyllong”.
Nangta, u iathuh shuh shuh, ba kitei ki briew, kiba shong na shiliang ka Wah Umsiang, Patoli ter ter, ki dang don kiba hap hapoh ka jingpeit jong U Basan Nongkseh bad kitei ki dang don ka jinglehniam jongki, namar ba ma ki ruh, ki bat ia u ryngkew u basa, ia u lei Shyllong, ha kaba ki ngeit ba u dei u ryngkew u basa jongki.