Ka jing iehnoh jongnga, ka dei na ka jingtlot ki nongking lieng, ong u bah Charles

Shillong: U MLA ka Nongthymmai Constituency u Bah Charles Pyngrope, ha ka sngi nyngkong u la pynpaw ba ka daw ba u la rai ban mih noh na ka seng Congress, ka long namar ba ki nongialam jong ka, ki la tlod bad kim nang ban pyniaid ia ka seng.

Haba kren ha ka sngi ba pynkum burom ia u Bah Charles Pyngrope, hadien ba u la shah thung kum u nongialam rangbah ka State Trinamool Congress u Bah Charles u la ong “Ka Congress kan neh bad ka lieng jong kam kan iaid bad kan ym ngam hynrei ki nongkieng ia ka lieng ki la tlot”.

U la bynrap shuh shuh “Haba tlot ki nongkieng lieng na ka liang jong ngi ngin hap wad ia ki lad ki lynti ban ioh ban trei ia kane ka kam, bad kan shong ha u paidbah ba un bud”. U la pynpaw ruh ka jingshaniah ia ki paidbah ki ba lawan ban pynkup burom ia u da kaba ong ba un iai shakri ia ki paidbah da kaba un phai sha kane ka seng AITMC.

Na ka liang u MDC ka Rambrai Jyrngam u Bah Bajop Pyngrope, haba u la leit ban shimbynta lang ia kane ka sngi u la ong ba ka TMC ka dei ka seng kaba lah ban ialam ia ka Eastern India.
“Da ka jingtreilang ki liang pyrshah khlem artatien ha u snem 2024 ka TMC kan ioh synshar ia ka ri hapoh ka jingialam jong ka Mamata Banerji kum ka Myntri rangbah duh”u la ong.

Halor ka jingpyniasoh jong u bad ka TMC u Bah Pyngrope u la ong ba un sa pyniasoh ialade, ynda la dei ka por namar ba mynta hi yn hap ban iaid bad trei shuwa ha ki Constituency, khnang ba un lah ban pynsuhthied ia kane ka seng.