Ialam bakla ki kynhun pynlong ia tainia: Pynshngain

Shillong, 19 Jylliew:
U Chief Executive Member ka KHADC u bah Pynshngain N Syiem u la kynnoh ba ki lai kynhun ka Sur Ki Samla Mawlai, FKJGP bad KSU Mawlai kiba pynlong ia ka jingiapyni nia lashai ka sngi ha Mawlai Phudmuri ki la ialam bakla ia ki paidbah namar ba ki la kam ha ki kot khubor ba ma u ruh un leit ia shim bynta ha katei ka rynsan ia pyni nia, kaba u la ong ba u khlem kular lane kohnguh ha ki ba un leit ia shim bynta.
U la ong ba ha ka por ba ki wan ai jingthoh bad wan ia kynduh ia u ha kamra treikam jong u ban khot sha katei ka rynsan u la ong ba u la ai ha kid a u phone nombar jong u bad u la ong ba kin sa phone ia u ban pynthikna namar ba u dang hap ban ia syllok bad ka EC bad kumjuh ruh ki MDC ka PDF bad hadien ba la dep ia kren bad ki para MDC u la ong ba u la shim ia ka rai ban ym leit hynrei u kyndit ban iohi ha ki kot khubor ba kitei ki lai kynhun ki la kam ba ma u ruh un leit ia shim bynta lang. “Katei ka jingpyn mih khubor ka dei kaba ialam bakla ia u paidbah” ong u bah Pynshngain.
“Ngam kwah shuh ban ai kano kano ka jingkynthoh halor ka VAB hadien ba ngi la dep iakren hapoh ka iing dorbar namar ka jingkwah ka jong ngi ka long bau Lat ka jylla un mynjur noh ia ka VAB khnang ban ai bor biang ia ki Rangbah shnong ba kin treikam” u la ong. U Bah Pyn shngain u la ong ka jingiatainia ha ki jaka paidbah kan nym poi shano shano ruh namar kam lah ban weng ia ka jingeh jong ki Rangbah shnong. Ha ka juh ka por u la ong, ba dei ban ai lad ia u Lat ka jylla ba un mynjur bad yn sa wanrah pat ia ka jingpynkylla ban pynrung ia ki kyndon ha kane ka VAB.