Shillong:”Ka jingang nud ban pynkhuid ïa ka Wahumkhrah ka dei kaba lah slem bha ban pynwandur biang ïa ka kumba long ha ki por mynshwa, hynrei kan long lehnohei pat ka jingpyrshang ka sor kar Pdeng ban ai pisa ïa ka sorkar jylla lyngba ka tnat Shil long Municipal Board lada kam don pat ka jingpyndonkam hok bad jingkheiñ ba khuid,” ong u MLA ka 17 North Shillong Constituency u Bah Adelbert Nongrum.
Haba kren bad u nongthoh khubor u Bah Nongrum u la ong, “Kan long kaba lyngngoh pat ban leh klet ïa ki MLA kiba dangdon ka jingïasoh bad ka Wahumkhrah, kum ka Pynthorumkhrah, ka Nongthymmai, ka Mawlai bad ka 17 North Shillong.”
U la ong ba ka jingpynkhuid ïa ka Wahumkhrah ka long lyngba ka jingbei pisa ka sorkar Pdeng sha ka jylla bad ka jylla sha ka tnat sorkar bad u pynpaw ka jingïaroh ïa ka sorkar lyngba ka SMB ba la shim ïa kane ka sienjam bad ngeit skhem ba tang ka jingpynkhuid kan ym lah ban leh eiei lada khlem shna ki aiñ bad ki rukom treikam.
“Donkam ka jingïatreilang ki paidbah, namar ka jingim shimet ki briew hi kaba la pynsniew dur ïa ka Wahumkhrah, kumta nga kyntu ïa ka KHADC ban ïatreilang bad ka sorkar, namar ka KHADC ka long trai ïa ka Wahumkhrah kumta donkam ban pynkhuid ïa ka naduh tynrai ban ïoh biang ïa ka tynrai jong ka khyndew ka Wah (original bed) bad ïa kito kiba tam pud sha wah kum ki jingtei ba long khaiï bad jaka sah ba dei ban leh da ka kam khnang ban ïoh biang ka jinglong tynrai ka um,” ong u Bah Nongrum.
U la ong ba watla um tip la ka KHADC ka donkti lang ne em ha ka jingpynkhuid, hynrei u kyntu ba ka KHADC bad SMB kidei ban pyrkhing da ki aiñ sha baroh ki nongshong shnong bad ki non-scheduled area kiba bun dei ki Commercial cum residence ban shim khia ban shna da ki jingker ne waste trap ban pyntuid beit tang ka um shapoh Wah bad da ka jingpynkhuid ïa ki jaboh ka um kan ïoh biang ka jaka ka hok jong ka jingïaid lynti jong ka.
“Kadei ban don ka jingshim rai kaba neh, ban buh ki nongpahara ka Wah (River guard) ban tehlakam ka bret jaboh, ban buh CCTV ban lap kiba pynjaboh, khnang ba ka jingpynkhuid kan ne ym ban pynsyrwa kai ka pisa,” u la ong bad bynrap ba ki bor shnong, KHADC bad Municipal ban phah leit peit sha ki thliew ïing ban phah buh ki waste trap.
“Ki don ki bynta jong ka shilynter ka Wah kiba lah pynwandur ban shna ki jaka khring ki nongwan jngohkai khnang ban thaw ki lad aikam aijam bad ban ïoh kamai,” pynkut u Bah Nongrum.
Nga kwah ban ai jingmut ban shna noh Da ka checked dam ha shi lynter kum naduh jingkieng thang briew haduh umsoh sun. Ha kato ka jaka thung bunjait ki water lily lane ki lotus… Khnang ba kin kjit ia ka um jaboh bad kan long jaka shongkai pyngad… Bad por mynta por tlang ba rit ka um drill noh ar lai jaka ki source ban pyllait sha wah umkhrah… Por lyiur te ym donkam than ba pahuh u slap..