Nang twa jubor, ka ktem ka Congress

Ka ktem jong ka seng Congress, ka la nang twa jubor ha kine ki sngi bad kane ka jingtwa, kam dei shuh tang ia ki MLA, hynrei la iohi, ba ka jingtwa ka la khynra jubor pynban, sa ia ki nongkitkam bapher jong katei ka seng, ha kaba ki Youth Congress, ki nongialam ka NSUI, ki la nang pynher ia ki shithi iehnoh kam jongki.

Ka jingjia, ka dei ka bym pat ju jia ha ki phew snem mynshwa, naduh ba ka wan poi katei ka seng ha ka jylla, kaba dei ruh ka seng, kaba la ieid da u paid ba bun balang bad katei ka jingjia, ka la dei ia ki nongialam jong ka Meghalaya Pradesh Congress Committee (I), ba kin don kata ka jingsngew lehrain lane sngew kit khlieh bad wat ia ki khlieh jong katei ka seng na Delhi, ba kin peit biang ia la ka jong ka rai, da kaba kin bujli noh da kiwei, kiba kham lait na ka jingshah thad ne shah kynnoh ha ki para nongtrei seng.

Haba shu peit na ki jing woh daw, ha kine ki sngi, la iohi, ia kawei ka kyntien, kaba kongsan bha bad katei ka dei ka kyntien pisa, kaba la kynnoh, da ki nongtrei seng bad kata ka long, ba U MP lane U President ka seng Congress, u ju pyndonkam bha, ban wohnia wohdaw ia ki nongtrei seng jongu bad katei imat, ka thew ba kiba bit ban trei parti, ki dei beit tang ki briew kiba don pisa.

Mynta ka Congress, ka don sa tang 5ngut ki MLA bad kumta, lada ka met jong U Ma Vincent Pala, ka kylla long maw jynthut ia kiba bun, ka la dei namarkata ia ka AICC, ba kan khyllie biang ia katei ka lynnong bad ba kan ailad da kiwei pat ki nongialam, kum ka kong Ampareen Lyngdoh, lane U Bah RG Lyngdoh, U Bah PN Syiem lane lah ban leit phai biang sha U President barim, U Dr Celestine Lyngdoh, ba kin shimti ia ka kam nong ialam jong katei ka seng bad ba kin teh song biang ia ki langbrot kiba la nang sakma.

Ha kaba kum kane ka saw ka sian, ka la dei ruh ia U Ma Vincent Pala, ba un tyrwa da kaba sngew rit ialade, ba un aiti noh ia ka kam nongialam sha kiwei bad ba un duriap tyngeh ialade, ban long kum u ksiang jong ka seng Congress lane kum u ksiang jong ka jaitbynriew, da kaba un ia said tyngeh, halor ki ishu jong ka jait bynriew ha ka dorbar bah jong ka Parliament, kumba u paidlang jong ka jylla, ula jied ia u, ba un ia said ha katei ka duriaw bah, ym ha kine ki wah dud kiba rit ba ria.