Ngi tip aiu kein, ia ka jylla lajong?

Ha ki khyndiat bnai ba ladep, U Rupang, ula ioh ban iakren ia ki bun ngut, ki nong iakhun ia ka jylla rilum Meghalaya.
Ka dei ka jing iakren, kaba donkam ban sah kynmaw pateng pakit; hynrei kaba pyn pyrkhat ia une u nongthoh, ka long ba kiba bun ki lyngngoh, halor ki jing iathuh khana jong kine ki rang kynsai jong ka jaitbynriew, kiba don bynta dalade, ha ka jing iakhun ia ka jylla rilum bad ka jing shah pyntieng pynsmiej jongki, ha ki pulit Assam ha kitei ki por.

Hynrei katei kam dei eh ka mat, kaba ngin iakren hangne, namar ba ka mat, kaba ngi dei ban iakren, ka long ba balei te, ba ka jing ialeh ia ka jylla rilum, kam don ia kitei ki jing shisha bad ba ym don mano mano ba thoh ne ba pynkhreh halor katei ka bynta, kaba kongsan bha bad halor kane, ngi hap ban kynnoh ia ki stad ki nang, lane ki riew heh jabieng jong ka jaitbynriew, ba ki leit wad ia ka jingtip tang shabar, katba kim shym la kwah ban tip, ia kitei ki maw kordor kiba don, ha la ka jong ka tyngkong iing.

Kane ka jingleh, ka dei ka kam bieit, ka kam shah kynoi thiah, ha ka jabieng jong kiba nabar, kaba la pyn shoh khawiang ia kane ka juk, ba kam kwah shuh, tang ban kynmaw ia ka jingjia, kaba dang 50snem mynshwa.

Kumta ha kane ka jing rakhe ba 50 snem jong ka jylla, kam donkam eiei ruh em ban iakren, ia ki skim ki skam, ia ki jing ia kynthih kynthang, na ki jing ia shad ia kynhoi; hynrei ka sorkar jylla, ka dei ban shim ia ka rai, ban wad ia ki nongthoh kiba tbit tam, ba kin thoh bad pynmih, ha ka ktien Khasi bad phareng, ia ka jingiaid jong ka jing ialeh ia ka jylla rilum, da kaba leit iakren ia kitei ki shipai hill state, kiba dang im haduh ha kine ki sngi.

Kam pher, ka 50 snem, ka la wan bad ngi la ioh ia ka jylla rilum lane kaba ngi lah ban khot ha kine ki sngi, ka jylla rithor lum bad katba ngi sngew dei ban ong, hynrei ka mat, kaba ngi dei ban iakren, ka long ba lada ka jing iakhih, ki dap shynrang, jong ki 50 snem mynshwa, ka pynmih ia ka jylla rilum, kumta mangi pat ki khun ki ksiew, lane ki para ki pyrsa jongki; ngi don aiu ban iakhih lane ngi ioh aiu, ne ki jing iakhih ba ngi ju pynlong khah khah; lane mangi kiba im ha kine ki sngi, ngi don aiu, ban leh ia la ka Ri?